عام آدمی پارٹی13 فروری کو دہلی میں ریلی منعقد کرے گی
نئی دہلی،10 ؍فروری (ایس او نیوز؍آئی این ایس انڈیا) لوک سبھا انتخابات سے پہلے دہلی میں حکمران عام آدمی پارٹی وزیر اعظم نریندر مودی زیر قیادت مرکزی حکومت کے خلاف قومی دارالحکومت میں 13 فروری کو غیر بھاجپائی لیڈروں کی ایک مہا ریلی منعقد کر رہی ہے۔
عام آدمی پارٹی (آپ) کے سینئر لیڈر گوپال رائے نے اتوار کوکہاکہ تاناشاہی ہٹاؤ، ملک بچاؤ‘ ریلی 13 فروری کو جنتر منتر پر منعقد کی جائے گی۔مودی حکومت کے خلاف تمام اپوزیشن لیڈر اس ریلی میں شامل ہوں گے۔انہوں نے کہا کہ اس میں وہ تمام لیڈر شامل ہوں گے جنہوں نے گزشتہ ماہ کولکاتہ میں ممتا بنرجی کی ریلی میں شرکت کی تھی۔
ذرائع کے مطابق کانگریس کے ریلی میں حصہ لینے کا امکان نہیں ہے۔اس میں ممتا بنرجی اور چندرا بابو نائیڈو سمیت دیگر اپوزیشن لیڈر شرکت کر سکتے ہیں۔انہوں نے کہا کہ لوک سبھا انتخابات میں چند ماہ ہی باقی رہ گئے ہیں، ایسے وقت میں یہ ریلی اپوزیشن لیڈروں کو ساتھ لانے اور بی جے پی قیادت این ڈی اے کو چیلنج کرنے کے لئے ’مہاگٹھ بندھن‘کے قیام میں مدد کرے گی۔دہلی کے وزیر اعلی اور آپ کے کنوینر اروند کیجریوال نے بھی کولکاتہ کی ریلی میں شرکت کی تھی، جہاں انہوں نے مودی حکومت کو شکست دینے کا اعلان کیا تھا۔
