ایک سینئر مسلم قائدکی مدد سے میں کانگریس میں آیا: سدرامیا
بنگلورو:22/مئی (ایس او نیوز) وزیر اعلیٰ سدرامیا نے آج اعتراف کیا کہ کانگریس کے ایک سینئر مسلم قائد کی مدد سے انہوں نے کانگریس پارٹی میں شمولیت اختیار کی ہے۔ اپنے سیاسی حریف سابق وزیر ایچ وشواناتھ کے اس بیان پر کہ ان کی کوششوں سے سدرامیا کانگریس میں شامل ہوئے، سخت برہمی ظاہر کرتے ہوئے وزیر اعلیٰ نے کہاکہ اے آئی سی سی صدر سونیا گاندھی کے سیاسی مشیر احمد پٹیل سے ملاقات اور بات چیت کے بعد ہی وہ کانگریس میں شامل ہوئے، احمد پٹیل تک رسائی حاصل کرنے میں انہیں ایک سینئر مسلم قائد نے کافی مدد کی۔ آج ودھان سودھا کے روبرو بی بی ایم پی کی طرف سے شہر میں صفائی کیلئے خریدی گئی مشینوں کو ہری جھنڈی دکھانے کے بعد اخباری نمائندوں سے بات چیت کرتے ہوئے انہوں نے کہاکہ کانگریس میں ان کی شمولیت میں وشواناتھ کا کوئی اہم کردار نہیں ہے۔وشواناتھ روزانہ اگر اس طرح کے بیان دیتے رہیں تو اس پر ہر بار ردعمل ظاہر کرنا ضروری نہیں۔ کانگریس میں ان کی شمولیت کے متعلق وہ یہ واضح کردینا چاہتے ہیں کہ ایک مسلم لیڈر کی مدد سے انہوں نے احمد پٹیل سے رابطہ کیا اور ان سے رائے مشورہ کے بعد ہی وہ کانگریس پارٹی میں شامل ہوئے۔دوبارہ اس سلسلے میں بحث نہ ہو تو وہ بہتر سمجھیں گے۔ وزیر اعلیٰ نے اس موقع پر کہاکہ آنے والے اسمبلی انتخابات میں کانگریس پارٹی ایسے امیدواروں کو ہی ٹکٹ دے گی جو جیتنے کی صلاحیت رکھتے ہیں،تاکہ پارٹی اقتدار حاصل کرسکے۔انہوں نے کہاکہ امیدواروں کے انتخاب کے مرحلے میں سماجی انصاف کے تقاضوں کو ملحوظ رکھا جائے گا اور ساتھ ہی کامیابی کے امکانات کو بنیادی معیار قرار دیا جائے گا۔ انہوں نے کہاکہ پچھلے انتخابات کے دوران جو امیدوار بہت کم فرق سے ہار چکے ہیں ان کے ناموں پر بھی اس بار غور کیاجاسکتا ہے۔