ناسک میں ووٹوں کی گنتی کے دوران توڑ پھوڑ کرنے کے معاملے میں 9 گرفتار
ناسک،24فروری(ایس او نیوز/آئی این ایس انڈیا)ناسک بلدیاتی انتخابات کے ایک وارڈ میں ووٹوں کی گنتی کے دوران پتھراؤ اور گاڑیوں کو نقصان پہنچا نے کے معاملے میں نو افراد کو گرفتار کیا گیا ہے۔پولیس نے آج یہاں بتایا کہ اس واقعہ میں کچھ مقامی لوگ اور چھ پولیس اہلکار زخمی ہو گئے تھے اور ووٹوں کی گنتی میں بھی تاخیر ہو گئی تھی۔پولیس کو ہجوم کو منتشر کرنے کے لئے ہوا میں گولیاں چلانی پڑی،یہ بھیڑ بی جے پی اور شیو سینا کے حامیوں کی تھی جن کے درمیان میناتائی ٹھاکرے اسٹیڈیم میں جھڑپ ہو گئی تھی۔کل واقعہ کے وقت وارڈ نمبر تین میں ووٹوں کی گنتی ہو رہی تھی۔ووٹوں کی گنتی کے دوران بی جے پی شہر یونٹ کے سربراہ اور ممبر اسمبلی بالاصاحب ا سنپ کے بیٹے مچھندرااسنپ کو وارڈ نمبر تین کے گروپ اے سے فاتح قرار دیا گیا تھا۔شیوسینا کے کچھ کارکنوں نے الزام لگایا کہ وارڈ میں جتنے ووٹ ڈالے گئے ہیں، ای وی ایم مشین ان سے زیادہ ووٹ دکھا رہی تھی،اس کے بعد بی جے پی اور شیو سینا کے کارکنوں کے درمیان جھڑپ شروع ہو گئی۔ان لوگوں نے کچھ گاڑیوں کو نقصان پہنچا، جس میں پولیس کی گاڑی بھی شامل ہے،اس وجہ سے سینٹر میں حکام کو ووٹوں کی گنتی کو روکنا پڑا۔واقعہ کے سبب ہیراواڑی کے پچوٹی علاقے میں واقع ووٹوں کی گنتی مرکز کے باہر کشیدگی پیدا ہو گئی۔پچوٹی پولیس اسٹیشن کے انچارج دنیش باردیکر نے بتایا کہ ناسک کے پولیس کمشنر روندر کمار سنگھل سمیت سب پولیس افسران موقع پر پہنچے۔اس کے بعد صورت حال کو قابو میں کیا گیا۔پولیس نے بتایا کہ اس معاملے میں نو افراد کو گرفتار کیا گیا اور منسلک دفعات میں مقدمہ درج کیا گیا ہے۔