ایودھیا ، 19؍ نومبر (ایس او نیوز؍ آئی این ایس انڈیا ) ایودھیاپولیس نے ایودھیا چیک پوسٹ کے قریب شک کی بنیاد پر آٹھ نوجوانوں کو گرفتار کیاہے۔ پولیس نے کہاکہ یہ نوجوان ایک جیپ پرجا رہے تھے۔کل رات آدھی رات کے بعد انہیں چیک پوسٹر کے قریب روکا گیا تھا۔انسدادِدہشت گردی دستہ (اے ٹی ایس) کی جانب سے ہفتہ کو جاری بیان میں بتایا گیا کہ ایڈیشنل پولیس سپرنٹنڈنٹ راجیش ساہنی کی قیادت میں اے ٹی ایس کی ٹیم نوجوانوں سے پوچھ گچھ کے لیے لکھنؤ سے ایودھیا روانہ کی گئی ۔ساہنی نے بتایا کہ محمد سعید، محمد مدنی، محمد عرفان، محمد عبدل، محمد شکیل، محمد شاکر، محمد رضا اور محمد حسین راجستھان کے ناگور ضلع میں صدر تھانہ علاقہ کے خلیل نگرباسنے گاؤں کے رہنے والے ہیں۔پوچھ گچھ کے دوران اطلاع ملی کہ یہ نوجوان راجستھان سے زیارت کرنے نکلے تھے۔وہ اجمیر شریف، آگرہ خاص گنج اور بہرائچ سے ایودھیا ہوتے ہوئے اکبر پور بسکھاری کے کچھوچھاشریف جا رہے تھے۔ناگور پولیس کے مطابق ان نوجوانوں کا کوئی مجرمانہ ریکارڈ نہیں ہے۔تاہم ان نوجوانوں سے سیکورٹی کے ضروری نکات کی وجہ سے سوال کیاجا رہاہے۔