وجیاپور میں مزدور کے شیڈ سے ملے 8وی وی پیاٹ کے ڈبے۔ ووٹنگ میں ہیرا پھیری کا شبہ
وجیا پور 21؍مئی (ایس او نیوز) الیکٹرانک ووٹنگ مشین کے ساتھ جڑے رہنے والے ووٹر ویریفائیبل پیپر آڈٹ ٹریل (وی وی پیاٹ) کے بغیر بیٹری والے 8ڈبے یہاں پر ایک مزدور کے عارضی شیڈ میں پڑے ہوئے پائے گئے ہیں جس کے ساتھ ہی عوام میں یہ بات زور پکڑ رہی ہے کہ الیکشن کے دوران مختلف مقامات پر ووٹنگ مشینوں سے چھیڑ چھاڑ اور ہیرا پھیری کے الزامات کے پس منظر میں اس طرح وی وی پیاٹ کے ڈبے دستیاب ہونا بڑی اہمیت کا حامل ہوگیا ہے۔
بتایا گیا ہے کہ سڑک کی تعمیر سے متعلق مزدوری کرنے والوں کے شیڈ میں یہ ڈبے کپڑے اور سامان رکھنے کے لئے استعمال ہورہے تھے۔مگر یہ کہاں سے آئے اوراس سے پہلے ان ڈبوں کا استعمال کس مقام پر ووٹنگ مشین کے ساتھ ہوچکا ہے ، اس کی تحقیقات کی جارہی ہے۔
پولیس کا کہنا ہے کہ اس نے بغیر بیٹری والے وی وی پیاٹ کے 8 ڈبے ضبط کرلیے ہیں۔ اور کیس درج کرنے کے بعد تحقیقات شروع کردی ہے۔
خیال رہے کہ ان ڈبوں کی اہمیت اس وجہ سے بڑھ جاتی ہے کہ الیکٹرانک مشین میں پولنگ کے دوران جتنے ووٹ ڈالے گئے ہیں ، ان کی جانچ کے لئے ان ڈبوں میں پڑنے والے پیپر ووٹ سے مطابقت کی جاتی ہے۔
کرناٹکا کے چیف الیکشن افیسرسنجیو کمارنے بتایاکہ مزدوروں کے شیڈ میں ان ڈبوں کو کپڑے رکھنے کے لئے استعمال کیا جارہا تھا۔ ڈپٹی کمشنر نے موقع پر پہنچ کر جائزہ لیا ہے۔ ان ڈبو ں کے اندر مشین موجود نہیں ہے۔ ہم لوگ اس کے تعلق سے حقائق کا پتہ لگانے کی کوشش کررہے ہیں۔ڈپٹی کمشنر بی ایس شیٹانور نے یقین دلایا ہے کہ اس معاملے میں تحقیقات کے بعد کڑی کارروائی کی جائے گی۔
