بنگلورو17؍فروری(ایس او نیوز) بنگلورو بروہت مہانگر پالیکے( بی بی ایم پی) کا بجٹ23؍فروری کو پیش کیا جانے والا ہے۔ اس مرتبہ بجٹ میں عوام کی صحت پر زور دیا جائے گا۔ اس سلسلہ میں بنگلوروشہر کے محتلف مقامات پر8ہیلی پیڈس بنائے جائیں گے تاکہ ایر ایمبولینس کے ذریعہ شدید بیماروں اور حادثوں میں متاثرہ افراد کو کم سے کم وقفہ میں اسپتال میں پہنچایاجائے۔ فی الوقت شہر میں تقریباً50ہیلی پیڈس موجود ہیں جن کو شہر کے نجی املاک پر بنایاگیاہے۔ بی بی ایم پی کا پلان ہے کہ وہ خود ہیلی پیڈس بنائے گی اور یہ ہندوستان میں پہلا موقع ہے جسے شہری بلدی ادارہ بنارہاہے۔ فی الحال شہر میں چند نجی ہیلی کاپٹر سرویس الیکٹرانک سٹی سے بین الاقوامی ہوائی اڈہ تک 15منٹ کا سفر3000سے3500روپئے میں طے کراتی ہے، جسے اکثر ٹیکیس استعمال کرتے ہیں۔ تاہم بی بی ایم پی ہیلی پیڈس کو میڈیکل ایمر جنسی کے لئے بنانے کا ارادہ رکھتی ہے۔ مےئر سمپت راج نے اخباری نمائندوں کو بتایا کہ ہیلی پیڈ بنانے کے لئے ہر زون سے8مقامات کی نشاندہی کی گئی ہے۔ انہوں نے بتایا کہ اس کے بعد وہ ہمارے ہوجائیں گے۔ اس کے بعد اسے مناسب کرایے پر فراہم کیا جائے گا۔ ان ایر ایمبو لینسوں کو پرائیویٹ آپریٹرس سنبھالیں گے۔ یہ سہولت غریبوں کے لئے مہنگی ہونے کے سبب مےئر نے بتایا کہ اس سے متعلق وہ انشورنس کمپنیوں سے بات کررہے ہیں اور اسے مفت سرویس بنانے کے لئے کوشش کررہے ہیں۔ حادثہ کے وقت یا شدید بیماروں کو کچھ پہلے کے چند لمحے متاثرہ افراد کی زندگی کے لئے اہم ہوتے ہیں۔ ہیلی سرویس کے ذریعہ ان کی جان بچائی جاسکتی ہے۔ بی بی ایم پی بجٹ کو جے ڈی ایس کونسلر مہادیو پیش کریں گے جو فائنانس اور ٹیکسیشن کی اسٹانڈنگ کمیٹی کے چیرمین ہیں۔ انہوں نے بتایا کہ ان کی خواہش ہے کہ عوام کو صحت کے لئے سہولت فراہم کریں۔ بی بی ایم پی کے اسپتالوں کی اعلان کردہ اسکیموں کو بھی بجٹ میں پیش کیا جائے گا۔ وہ چاہتے ہیں کہ شہر کے بڑے اسپتالوں میں بھی ہر طرح کی سہولت فراہم ہو اور بی بی ایم پی صحت سے متعلق، سینئر سٹی زنس اور معذوروں کے لئے مختلف اسکیموں کو پیش کرے گی۔