گجرات میں بارش اور سیلاب سے 72افراد اور 900جانوروں کی موت
احمد آباد، 24؍جولائی(ایس او نیوز؍آئی این ایس انڈیا) گجرات میں بارش اور سیلاب سے اب تک72لوگوں کی موت ہو گئی ہے،بارش اور سیلاب سے900جانوروں کی بھی موت ہوئی ہے۔راحت اور بچاؤ کے کام میں فوج اور این ڈی آرایف کی ٹیمیں مصروف ہیں۔حالات کولے کروزیراعلیٰ وجے روپانی نے ہنگامی میٹنگ کی۔اس میں فضائیہ فورس، فوج،این ڈی آرایف افسران موجود تھے۔غور طلب ہے کہ گجرات کے کئی اضلاع میں مسلسل بارش کی وجہ سے سیلاب آ گیا ہے،سینکڑوں لوگ مختلف جگہوں پر پھنسے ہوئے ہیں،کئی علاقوں میں10انچ سے زیادہ بارش ہوئی ہے، جس سے ریاست میں 10ہائی وے اور 65سڑکیں بری طرح متاثر ہوئی ہیں۔سوراشٹرکے سریندرنگر، راج کوٹ، موربی، امریلی، جونا گڑھ، گیر اور سومناتھ اضلاع کے کئی علاقے سیلاب جیسے حالات ہیں۔اس کے علاوہ شمالی گجرات کے بناسکانٹھا-سابرکاٹھا ضلع اور جنوبی گجرات کے ولساڈ ضلع میں کل دن بھر جم کربارش ہوئی ہے اور یہاں کے نچلے علاقے بری طرح ڈوب گئے ہیں۔محکمہ موسمیات نے دو دن تک بارش ہونے کا امکان ظاہر کیا ہے۔سیلاب میں پھنسے لوگوں کو بچانے کے لئے فوج اوراین ڈی آرایف کی ٹیم لگی ہوئی ہیں۔فضائیہ کے چار ہیلی کاپٹر وہاں بھیجے گئے ہیں۔بناسکانٹھا میں فضائیہ کے 4ہیلی کاپٹر لگائے گئے ہیں۔
