منگلورو8؍فروری (ایس او نیوز) منگلورو میں مہاراشٹرا کے مچھلی تاجروں سے دن دہاڑے 5لاکھ روپے لوٹ کر فرار ہونے والی7ارکان پر مشتمل ٹولی کو ٹویرا کار سمیت اڈپی میں گرفتار کرلیا گیا ہے جن کا تعلق بھٹکل سے ہے۔

موصولہ تفصیلات کے مطابق کنکن ناڈ ی پولیس اسٹیشن میں 5فروری کو ایک شکایت درج کی گئی تھی کہ مہاراشٹرا کے رتناگیری سے محمد عارف نامی مچھلی کا تاجر منگلورو میں مچھلی فروشوں کورقم اداکرنے کے لئے آیا ہوا تھا۔جب وہ ریلوے اسٹیشن پر اترنے کے بعد آٹو رکشہ سے اپنی کاروباری ساتھی کو رقم دینے کے لئے جارہا تھا توKA53 B4418رجسٹریشن نمبر والی ایک ٹویرا کار میں آنے والے 5تا7افراد نے اس کا راستہ روکا اور اس کے پاس موجود 5لاکھ روپوں والی بیگ اور موبائل فون چھین کر فرار ہوگئے۔اس دوران کسی گمنام شخص نے ٹیلی فون پر پولیس کو ڈکیتی کی اطلاع دی تھی اور فون کاٹ دیا تھا۔

کنکن ناڈی پولیس نے آصف کی شکایت پر کیس درج کرلینے کے بعدمعاملے کی پوری سنجیدگی کے ساتھ جانچ شروع کی۔ 6فروری کی دیر رات کو پولیس نے اسی فون کی موجودگی کا مقام تلاش کرلیاجس پر کال کرکے پولیس کو ڈکیتی کی اطلاع دی گئی تھی۔جب پولیس کو پتہ چلا کہ جس کے پاس وہ فون موجود ہے وہ ہیجماڈی سے اڈپی کی طرف آگے بڑھ رہا ہے تو فوراً اڈپی پولیس کو چوکنّا کردیااور کار کے تعلق سے تفصیل بتادی۔ پھر اڈپی ٹریفک پولیس حرکت میں آگئی اور اس نے ٹویرا کار سمیت7 ملزموں کو کاپ کے پاس دبوچ لیااور کنکن ناڈی پولیس کے حوالے کردیا۔

پولس ذرائع کے مطابق گرفتار شدہ ملزمین کی شناخت بھٹکل گوُلمی کے رہنے محمد شبیر عرف موُر باٹلی شبیر، محمد نوید، خواجہ صاب، محمد نبیل صاب کے علاوہ بندر روڈمخدوم کالونی اور ڈونگر پلی کے  سید فیاض اور سید حسین اور خلیفہ اسٹریٹ کے رہنے والے ناصر شیخ کے طور پر کی گئی ہے۔ ان میں سے بیشتر ملزمین عادی جرائم پیشہ اور ہسٹری شیٹرز بتائے جاتے ہیں جن کے خلاف مختلف پولیس تھانوں میں پہلے سے مقدمات درج ہیں۔

پولیس نے ملزمین کے پاس سے لوٹے گئے پانچ لاکھ روپے اور موبائل فون برآمد کیے ہیں۔ان لٹیروں کو گرفتار کرنے کی مہم سٹی پولیس کمشنر ٹی آر سریش، ڈی سی پی ہنو منتھارایا، ڈی سی پی اوماپرشانت اور اے سی پی راماراؤکی نگرانی میں کنکن ناڈی پولیس انسپکٹر اشوک پی اور ان کے عملے نے انجام دی۔