کانگریس کے6 ممبران پارلیمنٹ 5دن کے لیے معطل ،میں ممبران پارلیمنٹ کی پارٹی کو دیکھ کر فیصلہ نہیں کرتی،سمترا مہاجن کادعویٰ
نئی دہلی، 24؍جولائی(ایس او نیوز؍آئی این ایس انڈیا)لوک سبھا اسپیکر سمترا مہاجن نے آج کانگریس کے6 ممبران پارلیمنٹ کو5دنوں کے لیے معطل کر دیا۔ان ممبران پارلیمنٹ پر اسپیکر کی جانب کاغذپھاڑکراچھالنے کا الزام ہے۔ان پانچ ممبران پارلیمنٹ میں گورو گگوئی، ادیر رنجن چودھری، رنجیت رنجن، ایم کے راگھون، سشمیتا دیب اور کے سریش شامل ہیں۔یہ ممبران بھیڑ کے تشدد پر کام روکو تجویز لانا چاہتے تھے۔دراصل، ممبران پارلیمنٹ نے آج موب لنچنگ کے معاملے پر ہنگامہ کیا۔جب کانگریس کے کئی ارکان پارلیمنٹ نے لوک سبھا اسپیکر کے سامنے کاغذ اچھالے تو اننت کمار نے کہا کہ کانگریس ممبران پارلیمنٹ کی طرف سے اس طرح کی حرکت شرمناک ہے۔اس دوران کانگریس نائب صدر راہل گاندھی اور سونیا گاندھی بھی موجود تھے۔اسپیکر سمترا مہاجن نے کہا کہ دیکھنا چاہتی ہوں کہ ممبر پارلیمنٹ کتنی نظم و ضبط دکھا سکتے ہیں، ملک بھی ان کے رویے کو دیکھ رہا ہے۔ان تمام ممبران پارلیمنٹ پر پارلیمنٹ کی کارروائی میں رکاوٹ ڈالنے کا الزام تھا۔لوک سبھا اسپیکر سمترا مہاجن نے کہا کہ میں ممبران پارلیمنٹ کی پارٹی کو دیکھ کر فیصلہ نہیں کرتی،آج انہوں نے ایک بار نہیں چار بار کاغذ کے ٹکڑے پھینکے،بچوں جیسا کام کیا،کالج اور اسکول کے بچوں کو ہم کیا کہیں گے،آج کارروائی نہیں کریں گے تو کل کے لئے نظم و ضبط کس طرح رکھ پائیں گے۔کانگریس کے سینئر لیڈر ملک ارجن کھڑگے نے کہا کہ بھیڑ کے حملے سے قتل کے معاملے مسلسل بڑھ رہے ہیں۔مودی نے تین بار اس معاملے پر بولا لیکن کوئی عمل نہیں ہوا،جب تک قدم نہیں اٹھائے جائیں گے، یہ واقعات نہیں رکیں گے۔آج لوک سبھا میں بوفورس کا مسئلہ بھی اٹھایا گیا، جسے لے کر کانگریس نائب صدر راہل گاندھی نے کہا کہ وہ (بی جے پی)کافی طویل عرصے سے اس مسئلے کو اٹھا رہے ہیں،اگلے 30سالوں تک انہیں یہ مسئلہ اٹھانے دو۔