بنگلورو16جنوری (ایس او نیوز) وزیر برائے شہری ترقیات و حج آر روشن بیگ نے آج بتایا کہ 20 جنوری بروز ہفتہ شام 6 بجے ودھان سودھا کے بینکویٹ ہال میں کرناٹک کے عازمین کی قرعہ اندازی عمل میں آئیگی۔ وزیر اعلیٰ سدارامیا قرعہ اندازی کا افتتاح کریں گے۔ اخباری نمائندوں سے گفتگو کرتے ہوئے انہوں نے بتایا کہ اس مرتبہ کرناٹکا کیلئے 6624 کا حج کوٹہ مقرر کیا گیا ہے۔ جبکہ 18427 عرضیاں موصول ہوئی ہیں۔ جس کے تحت 70 سال سے زائد عمر والوں کی 658 اور بغیر محرم خواتین کی 28 عرضیاں موصول ہوئی ہیں۔ انہوں نے بتایا کہ جنرل زمرہ کے تحت 17741 عرضیاں موصول ہوئی ہیں۔ ان میں 5938 خوش نصیب عازمین حج کا انتخاب قرعہ اندازی کے ذریعہ عمل میں آئیگا۔ ضلع سطح پر مسلمانوں کی آبادی کے تناسب سنٹرل حج کمیٹی کے مخصوص سافٹ ویر کے ذریعہ آن لائن قرعہ اندازی عمل میں آئیگی۔ جناب روشن بیگ نے واضح کیا کہ قرعہ اندازی کیلئے تیاریاں مکمل کرلی گئی ہیں، اور کرناٹک کے حج کوٹہ میں اضافہ کیلئے وہ جدوجہد کررہے ہیں۔