5 تا 16/ جون ریاستی لیجسلیچر کا بقیہ بجٹ اجلاس
بنگلورو:17/مئی(ایس او نیوز) ریاستی لیجسلیچر کا بقیہ بجٹ اجلاس 5/ سے 16جون تک طلب کیاگیا ہے۔ آج وزیر اعلیٰ سدرامیا کی صدارت میں منعقدہ کابینہ میٹنگ میں یہ فیصلہ لیا گیا ہے۔ کابینہ میٹنگ کی تفصیلات سے میڈیا کو آگاہ کراتے ہوئے وزیر قانون وپارلیمانی امور ٹی بی جئے چندرا نے بتایاکہ بجٹ کا بقیہ اجلاس ودھان سودھا میں 5تا16/ جون مقرر ہوگا۔ انہوں نے کہاکہ اکرما سکرما اسکیم کے تحت سائٹوں کو باقاعدگی دینے کیلئے درج فہرست طبقات کو پانچ ہزار روپے ادا کرنے پڑیں گے، اور عام زمرے کے لوگوں کو حسب معمول فیس ادا کرنی پڑے گی۔کابینہ نے آج اس فیس کو منظوری دی۔ شہری علاقوں میں پائپ لائن کے ذریعہ رسوئی گیس کی فراہمی کے متعلق کابینہ نے ایک نئی کمپنی تشکیل دینے کا فیصلہ کیا ہے۔ کے ایس ایس آئی ڈی سی اور گیاس اتھارٹی آف انڈیا پرمشتمل کمپنی شہر کے مختلف علاقوں میں پائپ لائن کے ذریعہ رسوئی گیاس مہیا کرائے گی۔ شہر کے ماگڑی روڈ پر زیر تعمیر آروگیہ بھون کی تکمیل کیلئے پہلے اور دوسرے مرحلے کے پراجکٹ کیلئے کابینہ نے مزید22.85کروڑ روپے منظور کئے۔کوشیلیا ابھیرودھی مشن کے تحت فروغ ہنر کی کارروائیوں کو تقویت دینے کیلئے دیگر ایجنسیوں کے قیام پر بھی اتفاق کیاگیا۔ مرکزی حکومت کی اسکیم کے تحت سبسیڈی پر اناج حاصل کرکے مختلف خوردنی اسکیموں کیلئے حکومت نے مفت اناج فراہم کرنے کا فیصلہ کیا ہے۔ راشن کی دکانوں کی سطح پر بیداری کمیٹیاں اور مضبوط کرنے اور ان کے ذریعہ راشن کی دکانوں پر نگرانی یقینی بنانے کیلئے بھی کابینہ نے پہل کی ہے۔