زید میں کھیلے گئے پانچ ٹیموں والی کرکٹ سیریز میں الفلاح کی شاندار جیت؛ فائنل میں سوپر اسٹار کو شکست
دبئی 31 مارچ (ایس او نیوز) زید میں جاری پانچ ٹیموں والی کرکٹ سیریز کے فائنل میں آج بھٹکل کی الفلاح ٹیم نے سوپر اسٹار کو تین وکٹوں سے شکست دیتے ہوئے سیریز جیت لی۔
سیریز میں جملہ پانچ ٹیموں الفلاح، سوپر اسٹار، نوائط اسوسی ایشن، عسفا اور اسداللہ نے حصہ لیا تھا جس کا فائنل مقابلہ آج جمعہ کو متحدہ عرب امارات کے شہر زید میں کھیلا گیا۔
فائنل میں سوپر اسٹار کے کھلاڑیوں نے ٹاس جیت کر پہلے بلے بازی کی اورمقررہ 20 اووروں میں آل آوٹ 131 رن بنائے تھے، سوپر اسٹار کی جانب سے عبادہ برماور نے 45 قیمتی رن بنائے۔جواب میں الفلاح نے 17.5 اووروں میں سات وکٹوں کے نقصان پر ہی 134 رن اسکور کرکے میچ جیت لیا۔
الفلاح کی طرف سے ضیا ء قاضی نے 32 گیندوں پر دھواں دار 52 ناٹ آوٹ رن بنائے، انہوں نے اپنی اننگز میں چار شاندار چھکے لگائے۔جبکہ سرفراز جوکاکو نے 22 گیندوں پر تیز رفتار 39 رن بنائے، جس میں ایک چھکا اور چھ چوکے شامل ہیں۔ سوپر اسٹار کے خلاف الفلاح کے عنایت اللہ سوداگر نے پانچ وکٹیں حاصل کرتےہوئے شاندار بائولنگ کا مظاہرہ پیش کیا۔ انہیں مین آف دی میچ کے اعزاز سے نوازا گیا۔
پورے ٹورنامنٹ میں عُبادہ برماور نے شاندار کھیل کا مظاہرہ پیش کیا تھا، جس کی بناء پر اُسے مین آف دی سیریز کے اعزاز سے نوازا گیا۔
