بھٹکل:20/جون (ایس اؤنیوز) یہاں نوائط کالونی نیشنل ہائی وے پر ایک تیز رفتار کار ایک کے بعد ایک؛ تین سواریوں سے ٹکرانے کے نتیجے میں ایک آٹو ڈرائیور سمیت پانچ افراد زخمی ہوگئے جنہیں بھٹکل سرکاری اسپتال میں ابتدائی طبی امداد کے بعد کنداپور منتقل کیا گیا ہے۔

بتایا گیا ہے کہ کار میسور سے اڈپی ہوتے ہوئے مرڈیشور جارہی تھی کہ بھٹکل نوائط کالونی نیشنل ہائی وے پر موسلا دھار بارشوں کے چلتے بے قابو ہوگئی۔ کار پہلے مخالف سمت سے آنے والی ایک بائک سے ٹکرائی پھر ایک آٹو رکشہ اور بعد میں ایک لونا سے ٹکرا گئی۔ حادثہ منگل دوپہر قریب 3:30 بجے پیش ایا۔

 کار کی رفتار اور اس کی ٹکر کی شدت کا اندازہ اس بات سے لگایا جاسکتا ہے کہ بائک کو گرانے کے بعد آٹو رکشا سے ٹکرانے پر آٹو رکشہ بھی الٹ  گیا۔ جس سے رکشا پر سوار 4مسافر زخمی ہوئے تو بائک سوارکو بھی چوٹیں آئی جب کہ لونا سواری کار کے پہیوں میں پھنس گئی  جس سے کار وہیں رک گئی۔

زخمیوں کی شناخت آٹوڈرائیور ماروتی واسودیو شٹی ہیرتار(50)، آٹو پر سوار مسافر ہیبلے جامعہ آباد کے سامن (14)، صہیم (16) اور کونار سببتی کی رہنے والی لکشمی درگپا ہسلر کی حیثیت سے کی گئی ہے, جبکہ بائک سوار شنکر کورگا موگیر (36) کو بھی شدید چوٹ آئی  ہے۔ البتہ کار پر سوار سبھی لوگ محفوظ رہ گئے۔

کار ڈرائیور میسور کے ہریش بی ایس کے متعلق بتایا گیا ہے کہ وہ اپنے خاندان والوں کے ساتھ میسور سے مرڈیشور جارہا تھا۔

حادثے کے فوری بعد کثیر تعداد میں لوگ جائے وقوع پر جمع ہو گئے اور زخمیوں کو فوری سرکاری اسپتال پہنچایا۔

واقعہ کو لےکر بھٹکل پولس تھانہ میں کیس درج کیا گیا ہے۔ جانچ جاری ہے۔