بنگلورو،11؍جولائی(ایس او نیوز) ریاستی وزیر برائے اعلیٰ تعلیمات جی ٹی دیوے گوڈا نے کہاہے کہ سرکاری کالجوں میں لکچرارس ، معاون لکچرارس اور دیگر 4800اسامیوں کو ترجیحی بنیاد پر پر کرنے کے لئے محکمے نے قدم اٹھائے ہیں۔

آج ریاستی اسمبلی میں وقفۂ سوالات کے دوران امیش جی یادو کے سوال کا جواب دیتے ہوئے انہوں نے کہاکہ لکچرارس اور معاون لکچرارس کی 3800اسامیاں اور ایک ہزار دیگر اسامیوں کو جو پالیٹکنک کالجوں سے جڑی ہوئی ہیں ان میں پرنسپل کے عہدے بھی شامل ہیں۔

انہوں نے کہاکہ عنقریب ان تمام اسامیوں کو پر کرنے کے لئے قدم اٹھائے جائیں گے۔ انہوں نے کہاکہ شمالی کرناٹک میں مقرر کئے گئے لکچراروں کو تعیناتی کی بنیاد پر قدیم میسور علاقوں میں مقرر کرنے کی تجویز پر غور کیا جائے گا۔

وزیر موصوف نے کہاکہ ریاستی حکومت کی طرف سے کسی بھی کالج کے لکچرار کا تبادلہ کرنے یا انہیں لکچرارکی خدمت سے ہٹاکر کسی اور قسم کی خدمت پر مامور کرنے کی کوئی تجویز حکومت کے سامنے ہے اور نہ ہی قانون میں اس کی کوئی گنجائش ہے۔