بنکاک،22؍ستمبر(ایس او نیوز؍آئی این ایس انڈیا)تھائی لینڈ کے جنوبی صوبے پتانی میں سڑک کنارے نصب بم کے پھٹنے سے کم از کم چار فوجی ہلاک اور چھ زخمی ہوئے ہیں۔ تھائی لینڈ کی وزارت دفاع کے مطابق بم پھٹنے کا یہ واقعہ جمعرات اور جمعہ کی درمیانی شب رونما ہوا۔ فوجی ترجمان کے مطابق یہ بم سڑک کے قریب سے گزرنے والے ایک پائپ میں نصب تھا۔ بم پھٹنے سے فوجی ٹرک کا پچھلا حصہ پوری طرح تباہ ہو کر رہ گیا۔ پتانی دارالحکومت بنکاک سے ایک ہزار کلومیٹر کی مسافت پر ہے۔ اس علاقے میں تھائی مسلمانوں نے علیحدگی پسندی کی مسلح تحریک سن 2004 سے شروع کر رکھی ہے۔ اس پرتشدد تحریک میں اب تک ساڑھے چھ ہزار سے زائد افراد مارے جا چکے ہیں۔