بنگلورو،24؍ جولائی(ایس او نیوز) عراق میں تین سال قبل داعش کے دہشت گردوں کی طرف سے 39 ہندوستانیوں کا اغوا کیا گیا، لیکن اب تک انہیں واپس لانے کیلئے مرکزی حکومت کی طرف سے کوئی سنجیدہ کوشش نہیں کی گئی۔عراق کے موصل شہر میں ان کارکنوں کا اغوا کیا گیا، آج یہ شہر حکومت عراق کے قبضے میں واپس آچکا ہے، لیکن اب تک ان ہندوستانیوں کا پتہ لگانے میں حکومت ہند کی طرف سے کوئی سنجیدگی نہیں دکھائی گئی۔ یہ بات آج شانتی نگر کے رکن اسمبلی این اے حارث نے کہی۔ انہوں نے کہاکہ حال ہی میں وزیر اعظم مودی نے مغربی ایشیاء کے مختلف ممالک کا بارہا دورہ بھی کیا، لیکن اس مرحلے میں ان یرغمالوں کی رہائی کیلئے کوئی پہل نہیں ہوپائی۔ عراق میں آئی ایس آئی ایس کے دہشت گردوں کی طرف سے اغوا کئے گئے ہندوستانیوں کو رہا کروانے میں انہوں نے حکومت ہند کو ناکام قرار دیا اور کہاکہ کانگریس پچھلے چھ ماہ سے مرکزی حکومت سے اس بات کا مطالبہ کررہی ہے، لیکن کوئی قدم اٹھایا نہیں گیا۔