تالابوں کی صفائی کے لئے تین ہزار کروڑ روپے مہیا کرانے کا مطالبہ
بنگلورو، 13؍نومبر(ایس او نیوز) ریاست بھر میں تالابوں کی صفائی اور زیر زمین پانی کی سطح میں اضافے کے لئے وزیر برائے چھوٹی آبپاشی سی ایس پٹ راجو نے ریاستی حکومت سے مطالبہ کیا ہے کہ فوری طور پر ان کے محکمے کو تین ہزار کروڑ روپیوں کی رقم فراہم کی جائے ۔
اخباری نمائندوں سے بات چیت کرتے ہوئے انہوں نے کہاکہ محکمۂ چھوٹی آبپاشی کو ریاستی بجٹ میں پہلے ہی دو ہزار کروڑ روپیوں مہیا کرائے گئے ہیں۔ انہوں نے کہاکہ اس رقم کے استعمال سے زیر زمین پانی کی سطح کو بلند کرنے اور تالابوں کی صفائی کے لئے منصوبہ سازی کے تحت کام کیا جائے گا۔ انہوں نے کہا کہ جہاں بھی تالابوں سے کچرے کی نکاسی کا کام پورا ہورہاہے وہاں پی چیک ڈیم کے ذریعے پانی کے بہاؤ کو روک دیاگیا ہے، اس کے علاوہ زیر زیمن پانی کی سطح کو بہتر بنانے کے لئے بھی ضروری قدم اٹھائے گئے ہیں۔
مسٹر پٹ راجو نے بتایاکہ محکمے کے تحت آنے والے 3600 تالابوں کی ہمہ جہت ترقی پر خصوصی توجہ دینے کے ساتھ آنے والے دنوں میں اس کے لئے مخصوص پروگرام مرتب کئے جائیں گے۔ انہوں نے کہاکہ پچھلی حکومت میں تالابوں کی صفائی کے متعلق قانون میں ترمیم لائی گئی اس سے تالابوں کی نگرانی کے لئے مخصوص اتھارٹی کے قیام کا موقع فراہم ہوا۔ انہوں نے کہاکہ اس اتھارٹی کی چیرمین شپ خود وزیر اعلیٰ کے سپرد ہے۔ وظیفہ یاب سرکاری افسر اس اتھارٹی کے اراکین ہیں۔ وظیفہ یاب انجینئروں اور ماہرین آبپاشی کو اس کمیٹی میں شامل کیاگیا ہے، تاکہ ان کے مشوروں سے زیر زمین پانی کی سطح کو بلند کرنے کے ساتھ موجودہ تالابوں کے تحفظ کے لئے مناسب منصوبہ بندی کی جائے اور اسی کے مطابق صفائی اور دیکھ بھال کے کاموں کو آگے بڑھایاجا سکے۔
وزیر موصوف نے بتایاکہ ریاست بھر میں تالابوں کی حفاظت کے لئے عنقریب ان کا سروے کیا جائے گا۔ اس سلسلے میں تمام اضلاع کے ڈپٹی کمشنروں کو ہدایت دینے کے ساتھ چند کوآپریٹیو اداروں کی مدد بھی حاصل کی گئی ہے۔ انہوں نے کہاکہ شہر بنگلور کے تالابوں کی صفائی اور دیکھ بھال کے لئے کئی نجی کمپنیاں آگے آئی ہیں۔ پٹ راجو نے بتایاکہ تالابوں کی دیکھ ریکھ اور ان کی صفائی میں مبینہ لاپروائی قطعاً برداشت نہیں کی جائے گی۔
انہوں نے بتایاکہ شہر اور ریاست بھر کے تالابوں کی حفاظت کے لئے رکن اسمبلی اے ٹی رام سوامی اور سابق اسمبلی اسپیکر کے بی کولیواڈ کی قیادت والی کمیٹیوں نے حکومت کو جو رپورٹ پیش کی ہیں اس کی بنیاد پر تالابوں کے تحفظ کے لئے قدام اٹھایا جائے گا۔ وزیر موصوف نے بتایاکہ اب تک لیک ڈیولپمنٹ اتھارٹی کی دو میٹنگیں وزیر اعلیٰ کی صدارت میں ہوچکی ہیں۔ آنے والے دنوں میں ان میٹنگوں میں تالابوں کو ترقی دینے کے لئے اور بھی منظم منصوبے مرتب کئے جائیں گے۔