ہاسن کے آلور میں تیز رفتار کار کی درخت سے ٹکر؛ شادی ہونے سے پہلے ہی جوڑا چل بسا، ایک راہگیر بھی ہلاک؛ پانچ شدید زخمی
ہاسن 24/ جنوری (ایس او نیوز) ضلع ہاسن کے آلور تعلقہ میں پیش آئے ایک خطرناک سڑک حادثہ میں شادی ہونے سے پہلے ہی ایک جوڑا چل بسا، جبکہ حادثے میں راہ سے گذرنے والی ایک خاتون بھی ہلاک ہوگئی۔ حادثہ اُس وقت پیش آیا جب تیز رفتار کار جس پر جلد ہی شادی کے بندھن میں بندھنے والا جوڑا موجود تھا، بے قابو ہوکر پہلے ایک درخت سے ٹکرا گئی ، جس کے بعد قریب سے گذرنے والی ایک خاتون پر جاگری، جس کی زد میں تینوں موقع پر ہی ہلاک ہوگئے، جبکہ کار پر سوار ڈرائیور سمیت پانچ لوگ شدید زخمی ہوگئے۔
ذرائع سے ملی اطلاع کے مطابق ٹمکور ضلع کے ترویکیری کی سُپریت (27) اور گُبّی کے باگور دیہات کیرادھیکا (21) کی شادی 4فروری کو طئے تھی، مگر شادی سے پہلے یہ دونوں اپنے گھروالوں کے ساتھ وڈیو شوٹنگ کے لئے ترویکری سے فورچونر کار پر سوار ہاسن کے شیٹّی ہلّی چرچ میں گھرکے دیگر افراد کے ساتھ وڈیو شوٹنگ اور فوٹو گرافی وغیرہ کرنے کے بعد مزید وڈیو گرافی کے لئے سکلیشپور جارہےتھے۔
کار رادھیکا کا بھائی پربھو دیو چلارہا تھا، بتایا گیا ہے کہ کار کی رفتار اتنی زیادہ تھی کہ آلور تعلقہ کے پالیا نیشنل ہائی وے 75 پر بے قابو ہوگئی اور تیز رفتاری کے ساتھ ایک درخت سے ٹکرا گئی۔ بعد میں یہی کار قریب سے گذرنے والی ایک خاتون سے جا ٹکرائی، جس کے نتیجے میں سُپریت اور رادھیکا سمیت راہ گیر خاتون رتنماّ (55) موقع پر ہی ہلاک ہوگئے۔
حادثے میں رادھیکا کا بھائی پربھو دیو، رادھیکا کی ماں ششی کلا، دو فوٹو گرافر اور ایک میک آپ کرنے والی لڑکی شدید زخمی ہوگئے، جنہیں ہاسن سرکاری اسپتال میں داخل کیا گیا ہے۔ زخمیوں میں ششی کلا کی حالت نازک بتائی گئی ہے۔
حادثے کی اطلاع ملتے ہی مقامی پولس جائے وقوع پر پہنچی اور ضروری کاروائیوں کے بعد لاشوں کو پوسٹ مارٹم کے لئے بھیج دیا۔ پولس نے معاملے کے تعلق سے کیس درج کرلیا ہے اور مزید جانچ جاری ہے۔