میسور میں پیش آئے ایک المناک سڑک حادثہ میں بھٹکل کے ایک نوجوان سمیت تین کی موت
بھٹکل 31/جنوری (ایس او نیوز) بھٹکل سے تعلق رکھنے والا ایک نوجوان سمیت تین لوگ اُس وقت ہلاک ہوگئے جب اُن کی کار میسور میں ایک سڑک حادثہ کا شکار ہوگئی۔ بتایا گیا ہے کہ کار پر جملہ پانچ طلبا سوار تھے جو کالج سے گھر لوٹ رہے تھے کہ ان کی کار تیز رفتاری کے باعث بے قابو ہوکر ایک کھمبے سے ٹکراگئی۔ ٹکر لگتے ہی کار کئی پلٹیاں کھاتے ہوئے ایک ڈیوائیڈر سے ٹکرا کر اُلٹ گئی۔ حادثے میں تینوں کی موقع پر ہی موت واقع ہوگئی، جبکہ ڈرائیور سمیت دو لوگ شدید زخمی ہوگئے جنہیں قریبی اسپتال میں داخل کیا گیا ہے۔ حادثہ آج بدھ کی دوپہر کو میسور رِنگ روڈ ۔ گٹے گلّی نامی مقام پر پیش آیا۔
مرنے والے بھٹکل کے نوجوان کی شناخت ایس ایم سید ہاشم مصیب ابن سجاد ایس ایم کی حیثیت سے کی گئی ہے جو سینٹ جوسف کالج میں بی کام فائنل کا طالب العلم تھا۔ بتایا گیا ہے کہ وہ اپنے پانچ دوستوں کے ساتھ کالج کا ایک پروگرام ختم کرکے میسور کے این آر محلہ میں واقع اپنے گھر جارہا تھا، جس کے دوران یہ حادثہ پیش آیا۔
ذرائع سے ملی اطلاع کے مطابق ایس ایم سید ہاشم کے والدین ایک عرصہ سے میسور میں ہی مقیم ہیں۔ دیگر مہلوکین میسور کے ہی بتائے گئے ہیں، جبکہ زخمیوں کا تعلق بھی میسور سے ہی ہے۔ دونوں زخمیوں کی حالت انتہائی نازک بتائی گئی ہے۔
تینوں لاشوں کو میسور سرکاری اسپتال میں پوسٹ مارٹم کے لئے لے جایا گیا ہے۔
پولس مزید چھان بین کررہی ہے۔