بنگلورو،19؍جون(ایس اونیوز) ریاست کے دیہی علاقوں میں کام کرنے والے دیسی ڈاکٹرس فرضی نہیں ہیں۔ یہ بات آج ریاستی وزیر صحت رمیش کمار نے کونسل کو بتائی۔ انہوں نے کہاکہ برسوں سے ناٹی ڈاکٹروں کی طرف سے لوگوں کو جو دوائیں دی جارہی ہیں اس کا خاطر خواہ فائدہ ہورہاہے، ایسے ڈاکٹروں کے مفادات کی حفاظت اور فرضی ڈاکٹروں کے خلاف کارروائی کیلئے حکومت ایک ماہ کے اندر اپنا موقو ف واضح کرے گی۔بی جے پی کے ایس پی سنکنور کے سوال کا جواب دیتے ہوئے انہوں نے کہاکہ اصلی اور نقلی ڈاکٹروں کی پہچان کیلئے ریاستی حکومت نے ایک کمیٹی تشکیل دی ہے۔ کمیٹی حکومت کو اپنی رپورٹ اگلے ماہ پیش کرے گی۔انہوں نے کہاکہ دیسی اور آر ایم پی ڈاکٹروں کے مفادات کی حفاظت پر حکومت سنجیدگی سے غور کررہی ہے۔ وزیر موصوف نے بتایاکہ ریاست میں جملہ 2869 فرضی ڈاکٹروں کی نشاندہی کی گئی ہے۔ان میں سے 634 شیموگہ سے ہیں۔273کولار سے 276 بید ر سے 195 بیجاپور سے، اور 160بلگاوی سے ہیں۔ بنگلور اربن ضلع میں 8 فرضی ڈاکٹرس ہیں۔ بنگلور رورل ، رام نگرم ، چکمگلور اور منڈیا اضلاع میں ایک بھی فرضی ڈاکٹر موجود نہیں۔ انہوں نے کہاکہ فرضی ڈاکٹروں کے خلاف کارروائی کیلئے سخت ضوابط وضع کئے گئے ہیں ۔ پہلی غلطی پر ان کے خلاف 25ہزار روپے جرمانہ اور دوسری غلطی کیلئے ڈھائی لاکھ روپے کا جرمانہ اور ایک سال کی قید مقرر کی گئی ہے۔ اس کے بعد بھی اگر یہی سلسلہ جاری رہا تو جرمانہ پانچ لاکھ روپے اور قید تین سال کی ہوگی۔