بنگلورو،15؍اکتوبر(ایس او نیوز) وزیر اعلیٰ ایچ ڈی کمارسوامی نے ان الزامات کی تردید کی ہے کہ دفتر وزیر اعلیٰ میں اصراف پر کوئی روک نہیں لگا ئی گئی ہے۔

اخباری نمائندوں سے بات چیت کرتے ہوئے انہوں نے کہاکہ جب سے انہوں نے اقتدار سنبھالاہے ریاستی انتظامیہ کو کسی طرح کے اصراف کا موقع نہیں دیا ہے۔ یہاں تک کہ انہوں نے نئے وزراء کو نئی کاریں خریدنے کی اجازت تک نہیں دی اور وہ خود بھی اپنے دوروں کے لئے خصوصی طیارے کے استعمال سے گزیز کرتے ہیں ، مسافر طیاروں کے ذریعے ہی وہ مختلف مقامات کے دورے کرتے ہیں ۔

کمارسوامی نے کہاکہ بعض وزراء کی کاریں بیچ سڑک پر خراب بھی ہوگئیں ، اس کے باوجود بھی انہوں نے نئی کاریں خریدنے کی اجازت نہیں دی۔ ایسی صورت میں ریاستی حکومت پر اصراف کا الزام لگانا سراسر بہتان ہے۔ انہوں نے کہاکہ بحیثیت وزیر اعلیٰ مختلف اضلاع کا دورہ کرنے کی ضرورت انہیں بارہا پیش آتی ہے، اپنی صحت کی خرابی کے باوجود بھی وہ ہیلی کاپٹر یا طیارے سے سفر کرنے کی بجائے کار سے ہی سفر کو ترجیح دیتے ہیں۔ بعض آر ٹی آئی کارکنوں کی طرف سے دفتر وزیر اعلیٰ میں اصراف کے متعلق میڈیا میں پھیلائی گئی خبروں کو گمراہ کن قرار دیتے ہوئے انہوں نے کہاکہ ان کے دفتر میں صرف دس نئے ملازمین کو آؤٹ سورسنگ کنٹراکٹ پر مقرر کیا گیاہے، اس سے پہلے کے وزرائے اعلیٰ نے اپنے دفتر میں کتنے لوگوں کو کنٹراکٹ ملازمت پر فائز کیاتھا پہلے اس کی جانکاری حاصل کی جائے۔

انہوں نے کہاکہ دفتر وزیر اعلیٰ میں 189ملازمین کنٹراکٹ کی بنیاد پر اور 56ملازمین تعیناتی کی بنیاد پر کام کرتے ہیں۔ ان میں سے 88ملازمین کا تعلق دیگر محکموں سے ہے۔ وزیر اعلیٰ بننے کے بعد انہوں نے دیگر محکموں سے ان کے دفتر میں تعینات ملازمین کی تعداد میں کم کا سلسلہ شروع کیا ہے۔