لیبیا : صبراتہ کی لڑائی میں 26 افراد ہلاک اور 170 زخمی
طرابلس30ستمبر(ایس او نیوز؍آئی این ایس انڈیا)لیبیا میں قومی وفاق کی حکومت کی وزارت صحت نے جمعے کے روز اعلان کیا ہے کہ ملک کے مغربی شہر صبراتہ میں متحارب گروپوں کے درمیان دو ہفتوں سے جاری لڑائی کے نتیجے میں 26 افراد ہلاک اور 170 کے قریب زخمی ہو چکے ہیں۔ وزارت صحت کی جانب سے فیس بک پر جاری یہ بیان صبراتہ میں پرتشدد واقعات کے آغاز کے بعد سے پہلے سرکاری اعداد و شمار ہیں۔ دارالحکومت طرابلس سے 70 کلومیٹر مغرب میں واقع صبراتہ شہر بحیرہ روم کے ذریعے یورپ پہنچنے کی کوشش کرنے والے مہاجرین کے سفر کا نقطہ آغاز بن چکا ہے۔مذکورہ جھڑپوں کا آغاز 17 ستمبر کو احمد الباشی ملیشیا کے ایک رکن کی ہلاکت کے بعد ہوا۔ مقتول شخص انسانی اسمگلنگ کی کارروائیوں میں مقامی طور پر سرگرم تھا۔