ریاست کے محکمہئ سماجی بہبود میں 22 ہزار بھرتیاں جلد: آنجنیا
بنگلورو:20/مئی(ایس او نیوز) ریاستی وزیر برائے سماجی بہبود ایچ آنجنیا نے کہاکہ محکمہئ سماجی بہبود کی مخلوعہ 22ہزار اسامیوں کو پر کرنے کاعمل شروع ہوچکاہے۔ اس محکمہ کے تحت آنے والے محکمہئ پسماندہ طبقات اور محکمہئ درج فہرست طبقات کے دائرہ میں آنے والے 22308 عہدوں کو مرحلہ وار پر کیا جائے گا۔ آج ایک اخبار ی کانفرنس سے خطاب کرتے ہوئے انہوں نے کہاکہ طویل عرصہ سے یہ اسامیاں خالی پڑی ہوئی تھیں، ان اسامیوں کو پر کرنے سے ریاست کے دلت طبقات میں بے روزگاری کے مسئلے کو کچھ حد تک نمٹانے میں مدد ملے گی۔انہوں نے کہاکہ محکمہ میں ضلعی سطح کے عہدیداروں، تعلقہ عہدیداروں، اقامتی اسکولوں کے پرنسپل، اساتذہ، ہاسٹلوں کے وارڈن، فرسٹ ڈویژن اسسٹنٹ اور سکینڈ ڈویژن اسسٹنٹ کی اسامیوں کو کرناٹکا پبلک سرویس کمیشن کے ذریعہ پر کیا جائے گا۔ انہوں نے کہا کہ اس کے ساتھ ہی ہاسٹلوں میں باروچیوں، ان کے معاونین اور خاکروبوں کے علاوہ واچ مینوں کی بھرتی کااختیار اضلاع کے ڈپٹی کمشنروں اور ضلع پنچایت چیف ایگزی کیٹیو افسران کو دیا گیا ہے۔ شفافیت کے ساتھ تقرر کے اس عمل کو انجام تک پہنچایا جائے گا۔انہوں نے کہاکہ ریاست بھر کے اقامتی اسکولوں کیلئے 15380 اساتذہ کی اسامیاں منظور کی گئی ہیں، جن میں سے 4226 کی بھرتی کی جاچکی ہے، رواں سال 422 منظور کرلئے جائیں گے۔ انہوں نے کہا کہ محکمہ میں مختلف سطحوں پر بھرتیوں کی تجاویز کے پی ا یس سی کو روانہ کردی گئی ہے۔ انہوں نے کہا کہ رواں سال جو نئے اقامتی اسکول قائم ہوں گے ان کیلئے مزید 13205 اساتذہ کی بھرتی درکار ہے۔ عنقریب اس کیلئے بھی منظور ی حاصل کی جائے گی۔محکمہئ سماجی بہبود کیلئے حکومت نے حال ہی میں 16312اسامیوں کو منظوری دی ہے، جن میں سے 7348کو پرکیاجاچکا ہے۔ محکمہئ سماجی بہبود کے تحت کے پی ایس سی کے ذریعہ 760 عہدوں کی بھرتی کا عمل شروع ہوچکا ہے۔عنقریب اس عمل کو قطعیت دی جائے گی۔انہوں نے کہاکہ محکمہئ بہبودی ئ درج فہرست طبقات کیلئے 2500 اسامیاں منظور کی گئی ہیں جن میں سے752 کا تقرر ہوا ہے۔ 1748 اسامیاں اب بھی خالی پڑی ہوئی ہیں۔ ان میں سے 948 کا تقرر کیا جاچکا ہے۔کرناٹکا ایگزامنیشن اتھارٹی کی طرف سے بھی چند بھرتیاں کی جائیں گی۔