منگلورو ایئر پورٹ پر39لاکھ روپے مالیت کا اسمگل شدہ 1.2کیلو گرام سونا ضبط۔ مسافر گرفتار
منگلورو یکم ؍فروری (ایس او نیوز)دبئی سے منگلورو ایئر پورٹ پر آنے والے کاسرگوڈ کے مسافر کے پاس سے کسٹمز نے موبائل کی شکل میں پیک کرکے اسمگل شدہ 1.2کیلو گرام سونا ضبط کیا ہے جس کی مالیت 39لاکھ روپے بتائی جاتی ہے۔
بتایا جاتا ہے کہ مصدقہ اطلاع ملنے پر ڈائریکٹوریٹ آف ریوینیو انٹلی جنس(ڈی آر آئی) کے افسران نے منگلورو انٹرنیشنل ایئر پورٹ میں مسافروں کی آمد پر نظر رکھی۔ اور جیسے ہی اسپائس جیٹ کی فلائٹ دبئی سے پہنچی اور احمد نبیل غفور(21سال) نامی مسافر طیارے سے باہر نکلنے لگا تو طیارے کے دروازے پر ہی کسٹمزافسران اسے روک کرتفتیش کے لئے اپنے ساتھ لے گئے۔چھان بین کے دوران پتہ چلا کہ وہ اپنے پتلون کی جیب میں موبائل جیسی شکل کی کوئی چیز رکھاہوا ہے جس کا وزن عام موبائل سے زیادہ ہے۔ جب گہرائی سے جانچ کی گئی تو موبائل فون کے پاؤچ (کور) میں سونے کے بسکٹ چھپائے ہوئے ملے۔جن کا مجموعی وزن 1.2کیلو گرام نکلا۔ڈی آر آئی افسران نے غیر قانونی طور پرنبیل کے ذریعے لایاگیا39لاکھ روپے کا سونا ضبط کرلیا اور اسمگلنگ کے جرم میں اسے گرفتار کرلیاگیا۔