عازمین حج سے 19جون تک دوسر ی قسط کی رقم جمع کرانے کی ہدایت
بنگلورو،5؍جون(ایس او نیوز) امسال سفر حج بیت ا ﷲ کیلئے منتخب عازمین حج کی طرف سے ادا کی گئی پہلی قسط کی رقم 81 ہزار روپے کاٹ کر مختلف زمروں کیلئے کرناٹک کے مختلف ایمبار کیشن پوائنٹ سے روانہ ہونے والے عازمین حج کی طرف سے واجب الادا بقیہ رقم اور اسے جمع کرانے کی تاریخ کا اعلان کردیاگیا ہے ۔ ریاستی وزیر برائے شہری ترقیات وحج جناب روشن بیگ اور حج کمیٹی کے ایگزی کیٹیو آفیسر سرفراز خان نے اپنے ایک اخباری بیان میں اطلاع دی ہے کہ بنگلور سے جانے والے عازمین حج جنہوں نے گرین زمرے کا انتخاب کیا ہے ان کی مجموعی رقم 239600 روپے مقرر ہوئی ہے ، جن میں سے وہ 81 ہزار روپے کاٹ کر 158600 روپے جمع کرادیں۔ عزیزیہ زمرے کیلئے رقم 206200 روپے طے ہوئی ہے، پہلی قسط کاٹ کر باقی 125200روپے عازمین کوادا کرنے ہوں گے۔منگلور کے عازمین کیلئے 239150 روپے گرین زمرے کیلئے مقرر ہوئے ہیں اور بقیہ رقم 158150 روپے ادا کرنی ہوگی۔عزیزیہ زمرے کیلئے 205750 روپے مقرر ہوئے ہیں اور باقی رقم 124750 روپے ادا کرنی ہوگی۔حیدرآباد سے جانے والے عازمین کیلئے یہ رقم گرین زمرے کیلئے 235150 روپئے طے ہوئی ہے۔انہیں دوسری اور آخری قسط کے طور پر 154150 روپے اداکرنے ہوں گے۔ عزیزیہ زمرے کیلئے رقم 201800 روپے طے ہوئی ہے اور اب ہر عازم کو 120800 روپے ادا کرنے ہوں گے۔ گواسے جانے والے عازمین کیلئے گرین زمرے کی رقم 238350 روپے طے کی گئی ہے۔ انہیں دوسری اور آخری قسط کے طور پر 157350 روپے ادا کرنے ہوں گے۔عزیزیہ زمرے کیلئے رقم 205000 روپے طے کی گئی ہے۔ باقی رقم 124000 روپے انہیں ادا کرنے ہوں گے۔رقم کی ادائیگی کیلئے آخری تاریخ 19 جون 2017 مقرر کی گئی ہے۔ اسٹیٹ بینک آف انڈیا میں حج کمیٹی آف انڈیا اکاؤنٹ نمبر 32175020010 میں یہ رقم فی ٹائپ 25 درج کرکے جمع کرائی جاسکتی ہے۔ اسی طرح یونین بینک آف انڈیا کے اکاؤنٹ نمبر 318702010406009 میں بھی یہ رقم جمع کرائی جاسکتی ہے۔اگر یہ رقم مقررہ تاریخ تک ادانہیں کی گئی تو قرعہ میں منتخب عازمین کی نشستوں کو بغیر مزید اطلاع کے منسوخ مانا جائے گا۔ جو عازمین اسلامک ڈیولپمنٹ بینک کے قربانی کوپنس بھی حاصل کرنا چاہیں گے انہیں اپنی قطعی قسط کے ساتھ8ہزار روپے کی افزود رقم بھی ادا کرنی ہوگی۔