گلبرگہ میں کتّے کو بچانے کے چکر میں چار لوگوں کی موت؛ ایک بس کی دوسری بس سےخطرناک ٹکر
کلبرگی2/جون (ایس او نیوز) کلبرگی (یعنی گلبرگہ) کے جیورگی میں دوسرکاری بسوں کی ٹکر میں ایک بس ڈرائیور سمیت چار لوگ ہلاک ہوگئے، جبکہ دس سے زائد لوگ زخمی ہوگئے۔
ذرائع سے ملی اطلاع کے مطابق حادثہ آج سنیچر صبح قریب 8:30 بجے اُس وقت پیش آیا جب گلبرگہ سے داونگیرہ جانے والی بس کے سامنے اچانک ایک کُتا آگیا، کُتے کو بچانے کی کوشش میں ڈرائیور کے ہاتھوں بس بے قابو ہوگئی، ایک طرف بریج کی دیوار تھی جس سے ٹکرانے سے بچنے کی کوشش کی تو مخالف سمت سے آرہی دوسری بس سے تیز رفتاری کے ساتھ ٹکراگئی۔
بتایا گیا ہے کہ مخالف سمت سے آنے والی بس شاہ پور سے گلبرگہ جارہی تھی۔
گلبرگہ سے داونگیرہ جانے والی بس پر سوار تین اسکول ٹیچر جن کی شناخت عائشہ، فرینہ اور سہارا کی حیثیت سے کی گئی ہے، اس حادثے میں جاں بحق ہوگئی، جبکہ اسی بس کا ڈرائیور رُکمپا بھی زخموں کی تاب نہ لاکر اسپتال لے جانے کے دوران دم توڑ دیا۔ بتایا گیا ہے کہ تینوں ٹیچر اگلی سیٹ پر سوار تھیں، ٹکر لگتے ہی ایک ٹیچر بس کے باہر جاگری اور اُس کی موقع پر ہی موت واقع ہوگئی، جبکہ دیگر دو ٹیچروں نے اسپتال میں یا اسپتال پہنچنے کےدوران راستے میں دم توڑ دیا۔ ڈرائیور کے تعلق سے بتایا گیا ہے کہ وہ بری طرح پھنس گیا تھا، اُسے بس سے باہر نکالنے کے لئے جے سی بی کا استعمال کیا گیا اور کافی کافی مشقتوں کے بعد اُسے باہر نکال کر اسپتال لے جایا گیا، مگر اُس نے اسپتال پہنچنے سے پہلے ہی دم توڑ دیا۔ اس بس کے دیگردس مسافروں کو بھی چوٹیں آئی ہیں، جن کا قریبی اسپتال میں علاج جاری ہے۔
شاہ پور سے گلبرگہ جانے والی بس کے مسافروں کو معمولی چوٹیں آئی ہیں اور سبھی لوگ محفوظ ہیں۔
حادثے کے فوری بعد کافی لوگ مدد کے لئے پہنچ گئے ، جنہوں نے بتایا کہ ڈرائیور کے ساتھ ساتھ دو ٹیچر بھی بری طرح بس میں پھنس گئی تھی، جنہیں کافی مشقتوں کے بعدباہر نکال کر اسپتال روانہ کیا گیا تھا، مگر وہ جانبر نہیں ہوسکی۔ عینی شاہدین نے میڈیا والوں کو بتایا کہ صبح قریب آٹھ۔ ساڑھے آٹھ بجے زوردار بارش جاری تھی، کہ اچانک ایک کتا روڈ کے درمیان دوڑنے لگا، جس سے بچنے کی کوشش میں ایک بس کی دوسری بس سے ٹکر ہوگئی تھی۔