وینزویلا میں حکومت مخالف مظاہرے، دو افراد ہلاک
وینزویلا،20اپریل(ایس او نیوز/آئی این ایس انڈیا)وینزویلا میں دو مظاہرین کی ہلاکت کے بعد حکومت مخالف دھڑے نے اعلان کیا ہے کہ صدر نکولس مادْورو کے خلاف بڑے پیمانے کے احتجاجی مظاہروں کا دائرہ آج جمعرات کے روز مزید وسیع کر دیا جائے گا۔ اپوزیشن کے سربراہ اینرِیک کاپریلیس نے ایک پریس کانفرنس میں اپیل کی کہ وینزویلا کی پوری قوم ان مظاہروں میں حصہ لے۔ ملک کے دو شہروں میں دو الگ الگ واقعات میں دو مظاہرین سر میں گولی لگنے سے ہلاک ہو گئے تھے۔ اپوزیشن نے حکمران جماعت کے حامیوں کو ان واقعات کا ذمہ دار قرار دیا ہے۔ پولیس نے مظاہرین کے خلاف آنسو گیس استعمال کی اور چار سو سے زائد افراد کو حراست میں لے لیا۔