مینگلور میں پیش آئے دو مختلف حادثات میں دو افراد ہلاک
منگلورو 10/جنوری (ایس او نیوز) کرسمس اور نیو ایئر منانے کے لئے پردیس سے اپنے گھر آنے والے دو این آر آئی الگ الگ حادثات میں اپنی جان سے ہاتھ دھو بیٹھے۔
پہلے حادثے میں ہلاک ہونے والے شخص کا نام سائمن سیرل پنٹو(51سال) بتایاجاتا ہے۔ سائمن اٹلی کے ایک ہوٹل میں ملازمت کرتا تھا۔ چھٹی منانے کے لئے ابھی حال ہی میں گھر آیا تھا۔ گھر پر رنگ و روغن کا کام چل رہاتھا۔ سائمن بھی پینٹروں کے ساتھ مل کر کام میں لگا ہوا تھا۔ وہ ایک لوہے کی سیڑھی پر چڑھا ہواتھا کہ سیڑھی ہائی ٹینشن کیبل سے ٹکرا گئی۔ زبردست الیکٹرک شاک کی وجہ سے سائمن اور دیگر دو مزدور نیچے گر کر زخمی ہوگئے۔ سائمن کو انتہائی نازک حالت میں اسپتال لے جایا گیا مگر علاج کار گر نہیں ہوا اور اس نے دم توڑ دیا۔
دوسرے حادثے میں ہلاک ہونے والے کا نام رونالڈ نورونھا (57 سال)بتایا جاتاہے۔ رونالڈ مسقط میں ملازمت کررہاتھا اور وہ بھی کرسمس اور نیو ایئر منانے کے لئے چھٹی پر گھر آیا ہوا تھا۔ ذرائع سے ملی اطلاع کے مطابق وہ علی الصبح سڑک کے کنارے چہل قدمی کے لئے نکلا تھا جب ایک تیز رفتار کار نے اسے ٹکر ماردی۔بری طرح زخمی رونالڈ کو اسپتال میں داخل کیا گیا مگر وہ زخموں کی تاب نہ لا کر چل بسا۔دونوں معاملات میں پولیس نے کیس درج کرلیا ہے۔