غازی آباد میں تصادم کے بعد دو شاطر لٹیرے گرفتار
غازی آباد ،15؍ ستمبر (ایس او نیوز؍آئی این ایس انڈیا) اترپردیش کے غازی آباد ضلع میں ایک کے بعد ایک 18لوٹ اور ڈاکہ زنی کی وارداتین کر چکے بدنام ناصر اور مزمل کو جمعہ کی شب ایک تصادم میں صاحب آباد تھانہ کی پولس نے گرفتار کر لیا۔ ان کے پاس سے حال میں لوٹ کے ذریعہ حاصل کی گئی رقم برآمد کی گئی ہے۔ گذشتہ شب صاحب آباد تھانہ کی پولس تلاشی مہم چلا رہی تھی تب ہی سامنے سے اپاچے موٹر سائیکل سے آتے ہوئے ناصر اور مزمل انہیں دیکھ کر بھاگنے لگے۔ پولس نے ملزمان کو بھاگتے ہوئے دیکھ کر ان کا تعاقب کیا۔ اسی درمیان ناصر نے گولیاں چلانی شروع کردیں۔ اندھیرے میں بھاگ رہے دونوں ملزمان نے سکندرپور گاؤں کا راستہ پکڑ لیا اور گاؤں کی سڑک پر ایک گڈھے میں موٹر سائیکل کاپہیہ آنے پر وہ بے قابو ہوکر گر پڑے۔اس کے بعددونوں پید ل بھاگنے لگے۔ پولس نے پیچھا کرتے ہوئے گولیا ں چلائیں جس میں مزمل کے پیر میں گولی لگی اور ناصر کے بائیں ہاتھ میں ایک گولی لگ گئی۔ پولس نے دونوں ملزمان کو گرفتار کرلیا۔ صاحب آباد تھانہ کے انچارج انسپکٹر نے ہفتہ کے روز بتایا کہ پکڑے گئے ملزمان ناصر اور مزمل نے بے خوف طریقہ سے لوٹ اور ڈاکہ زنی کی وارداتیں کرکے تاجروں اور اعلیٰ افسران کی نیند اڑا دی تھی۔ ان کی تلاش میں رات میں تلاشی مہم چلائی جارہی تھی۔ گذشتہ شب تلاشی کے دوران ہوئے تصادم میں آخر کار پولس نے انہیں گرفتا رکر لیا۔ اس دوران ایک سپاہی بھی زخمی ہوا ہے۔ تمام کا علاج اسپتال میں چل رہا ہے۔ انہوں نے بتایا کہ ناصر اور مزمل کے پاس سے موٹر سائیکل اپاچے، 20ہزار روپے ، دوپستول 32بور، 10زندہ کارتوس برآمد ہوا ہے۔ پولس کو پوچھ گچھ میں انہوں نے ڈاکہ زنی اور لوٹ کی وارداتوں کی اطلاع دی ہے ۔ ان کے خلاف درج مقدموں میں پولس آگے کی کاروائی کر رہی ہے۔