نئی دہلی، 15 مارچ(ایس او نیوز؍آئی این ایس انڈیا) سپریم کورٹ نے سابق وزیر اعظم اندرا گاندھی کے قتل کے بعد ہوئے سکھ مخالف فسادات سے متعلق ایک معاملے میں عمر قید کی سزا کاٹ رہے کانگریس کے سابق رہنما سجن کمار کی ضمانت عرضی پر سماعت 25 مارچ تک ملتوی کردی ہے۔جسٹس ایس اے بوبڈے اور جسٹس ایس اے نظیر کی بنچ نے جمعرات کو سجن کمار کی عرضی پر سماعت 25مارچ تک کے لئے ملتوی کردی۔ تین مرتبہ ممبر پارلیمنٹ رہ چکے 73 سالہ سجن کمار نے سزا کے خلاف سپریم کورٹ میں ضمانت عرضی دائر کی تھی۔ جسٹس سنجیو کھنہ نے 25فروری کو سجن کمار کی ضمانت عرضی پر سماعت سے خود کو الگ کرلیا تھا۔سابق وزیر اعظم کے قتل کے بعد راج نگر میں ایک ہی خاندان کے پانچ افراد کا قتل اور جلانے کے معاملے میں گذشتہ سال 17 دسمبر کو سجن کمار کو عمر قید کی سزا سنائی گئی تھی۔ سزا سنائے جانے کے دو ہفتہ کے بعد 31دسمبر کو سجن کمار نے کڑکڑ ڈوما عدالت میں خود سپردگی کردی تھی