بھٹکل کے ایک رہائشی اسکول کی 16 طالبات بیمار؛ غیر معیاری غذا کھانے سے بیمار ہونے کا خدشہ
بھٹکل 21/نومبر (ایس او نیوز) تعلقہ کے پورورگا میں واقع کتور رانی چنما رہائشی اسکول میں 16 طالبات کے اچانک بیمار پڑکر اسپتال میں داخل ہونے کی واردات منظر عام پر آئی ہے، جس میں ایک طالبہ کو پیٹ میں شدید درد، دست اور قئے کی شکایت کے بعد کنداپور لے جایا گیا ہے۔
ذرائع سے ملی اطلاع کے مطابق منگل کی شب قریب 11 بجے مُٹھلی کی ایک طالبہ کو شدید تکلیف کی حالت میں سرکاری اسپتال لایا گیا تو پتہ چلا کہ منگل کی شام کو تین دیگر طالبات کو بھی اسپتال میں لایا گیا تھا، جن کو علاج تجویز کئے جانے کے بعد گھر روانہ کیا گیا ہے۔ اس موقع پر گفتگو کرتے ہوئے سرکاری اسپتال کے ڈاکٹر ستیش کمار نے بتایا کہ کل پیر کو بھی اسی رہائشی اسکول سے 12 طالبات کو دست اور قئے کی شکایت پر اسپتال لایا گیا تھا، جن کا علاج کیا جاچکا ہے۔
ڈاکٹر کے مطابق آج منگل رات قریب گیارہ بجے اسپتال میں لائی جانے والی طالبہ کی شناخت اُرشینی نارائن نائک (15) کی حیثیت سے کی گئی ہے، جسے بعد میں کنداپور اسپتال لے جایا گیا ہے۔
شبہ ظاہر کیا جارہا ہے کہ غیر معیاری کھانے کی وجہ سے یہ طالبات بیمار ہوئی تھیں اورسبھی 16 طالبات کو دست اور قئے کے ساتھ پیٹ میں درد کی شکایت تھی۔
بتایا جارہا ہے کہ اس سے پہلے مارچ مہینہ میں بھی اسی اسکول سے 20 بچے مبینہ طور پر غذا کھانے سے بیمار پڑ گئے تھے، مگر اسکول انتظامیہ نے آلودہ غذا کی سختی کے ساتھ تردید کی تھی۔
خیال رہے کہ پورورگاہ میں واقع اس رہائشی اسکول میں جملہ 216 طالبات زیرتعلیم ہیں۔