14؍سالہ لڑکی کے ساتھ جنسی ہراسانی کا معاملہ مجرموں کو 10سال جیل کی سزا، 25ہزار جرمانہ
ٹمکور:9؍فروری (ایس او نیوز) 14؍ سالہ لڑکی کی عصمت دری کے معاملے میں ملوث 2افراد کو یہاں کی تیسری ڈسٹرکٹ اینڈ سیشنس عدالت نے سخت سزا اور جرمانہ عائد کرتے ہوے سزاء سنائی ہے۔ ضلع کے پاؤگڈھ تعلقہ کے ایک دیہات میں 2015میں تپے سوامی (60) اور ملپا (35) نامی دو افراد نے لڑکی کے ساتھ منہ کالا کیا تھا۔ اس خصوص میں پاؤگڈھ پولیس تھانے میں معاملہ درج ہوا تھا۔تحقیقاتی آفیسر گروسوامی نے عدالت میں چارج شیٹ داخل کی تھی، ٹمکور کی عدالت میں اس معاملے کی سماعت ہوئی۔ بچوں پر جنسی مظالم کنٹرول ایکٹ کے کالم 6 کے تحت 10سال جیل کی سزا اور 25ہزار روپئے جرمانہ عائد کرتے ہوئے سزا سنائی ہے۔ اس کے علاوہ درج فہرست ذات اور درج فہرست قبائلوں کے مظالم کنٹرول ایکٹ کے تحت عمر قید کی سزا اور 25ہزار روپئے جرمانہ عائد کیا ہے۔مجرم کی طرف سے جرمانہ کی رقم ادا نہ کئے جانے کی صورت میں مزید 2سال کی سزا کاٹنی ہوگی۔اس معاملے کے ایک ملزم کی تحقیقات کے دوران ہی موت ہوجانے کے سبب ملپا نامی مجرم پر یہ سزاء اور جرمانہ عائد ہوگا۔ اس معاملے کی حکومت کی جانب سے پوسکو عدالت کی خصوصی نمائندہ گائتری راجو نے وکالت کی۔