بھونیشور،13؍ اکتوبر (ایس او نیوز؍آئی این ایس انڈیا) اڈیشہ کے گج پتی ضلع میں تیلی طوفان کے بعد ہوئی شدید بارش کی وجہ سے زمین کھسکی اور اس میں کم از کم 12 افراد کے مرنے کا خدشہ ہے اور جبکہ چار افراد لاپتہ ہیں۔یہ معلومات خاص ریلیف کمشنر بی پی سیٹھی نے ہفتہ کو دی۔انہوں نے بتایا کہ یہ واقعہ اس وقت ہوا جب جمعہ کی شام شدید بارش کے بعد کچھ دیہاتیوں نے ایک غارمیں پناہ لی تھی۔سیٹھی نے بتایاکہ گج پتی ضلع کے رائے گڑا ڈویژن کے تحت برگھارا گاؤں میں شدید بارش کی وجہ سے زمین کھسک گئی جس کی وجہ سے تقریباً 12 افراد کے مرنے کی خبر ہے۔انہوں نے بتایا کہ چار افراد لاپتہ ہیں اور ان کے ملبے میں دبے ہونے کا خدشہ ہے۔انہوں نے بتایا کہ گج پتی ضلع کے مجسٹریٹ کو جائے وقوعہ پر جانے اور صورتحال کا جائزہ لے کر تفصیلی رپورٹ دینے کو کہا گیا ہے۔سیٹھی نے بتایا کہ رپورٹ ملنے کے بعد سرکاری دفعات کے مطابق متاثرہ لوگوں کو مالی مدد مہیا کرائی جائے گی۔افسر نے بتایا کہ مسلسل بارش سے متاثرہ علاقے میں این ڈی آر ایف کے اہلکاروں سمیت ایک امدادی ٹیم کو بھیجا گیا ہے۔پالسا کے نزدیک گوپال پور کے جنوب مغرب میں جمعرات کو طوفان کی وجہ سے زمین کھسک گئی تھی۔اس دوران افسر نے بتایا کہ دیگر علاقوں میں پانی میں کمی کے ساتھ ہی راحت اور بچاؤ مہم زور وں پر ہے۔ حالات کا جائزہ لینے سے وزیر اعلی نوین پٹنائک نے گجم، گج پتی اور رائے گڑھا اضلاع سمیت کچھ متاثرہ علاقوں کا ہوائی سروے کریں گے۔