کانپور، 4/مئی (ایس او نیوز/آئی این ایس انڈیا)جموں و کشمیر میں علیحدگی پسندوں اور دہشت گردوں سے برسرپیکار فوج اور نیم فوجی دستوں کے جوانوں کی مدد کے لیے اب سنتوں کا ایک گروپ روانہ ہونے کی تیاری کر رہا ہے۔کانپور کی ایک ہندو تنظیم جن سینا کے بینر تلے تقریبا ایک ہزار سادھوسنت 7/مئی کو اس مقصد سے کشمیر روانہ ہوں گے۔خاص بات یہ ہے کہ ان سنتوں کے ساتھ پتھروں سے بھرا ٹرک بھی جائے گا تاکہ پتھربازوں کو انہیں کی زبان میں جواب دیا جا سکے۔جن سینا کے بانی بال یوگی چیتنیہ مہاراج نے صحافیوں سے کہا کہ اگر ضرورت پڑی تو اور بھی سنت بھیجے جائیں گے، پوری جاج مؤ میں واقع مندر کے پجاری ہیں۔انہوں نے صحافیوں سے کہا کہ جو لوگ جموں و کشمیر میں فوج کے جوانوں پر پتھر برسا رہے ہیں، وہ غدار ہیں۔ایسے لوگوں کو انہی کی زبان میں جواب دینے کے لیے شہر سے پتھربازوں کی فوج تیار کرلی گئی ہے۔جن سینا کے بانی نے اپنی اس مہم کو ’یودھ وجے یگیہ‘ کا نام دیا۔انہوں نے کہا کہ ہم نے وزیر اعظم نریندر مودی سے اجازت طلب کی تھی کہ کشمیر میں ہمیں پتھربازوں سے دو دو ہاتھ کرکے جوانوں کا حوصلہ بڑھانے دیا جائے،لیکن وہ ہمیں نہیں ملی۔ضلع انتظامیہ نے بھی اس کی اجازت نہیں دی ہے لیکن ہم نتائج کی پرواہ کئے بغیر اپنے راستے پر آگے بڑھیں گے، اگر ہمیں روکا گیا تو ہم اپنے طورپر پر وہاں جاکر پھر سے متحد ہو جائیں گے۔سنتوں کے جانے کے لیے 100 کاریں اورتین بسیں ریزرو کی گئی ہیں باقی لوگ ٹرین سے 14/مئی کو وہاں پہنچیں گے، ان کے ساتھ پتھروں سے بھرا ٹرک بھی جائے گا۔ساتھ ہی وہاں جانے والے سنتوں کو کانپور میں ہی پتھرمارنے کی ٹریننگ دی جائے گی۔