یوگی آدتیہ ناتھ کو خوش کرنے کی روایت؟ سرکاری سرکلر کے بعد تقریباً100 اسکولوں کوبھگوا رنگ سے رنگا
لکھنؤ، 09؍دسمبر (ایس او نیوز؍آئی این ایس انڈیا)یوپی میں بھگوا پہننے والے یوگی آدتیہ ناتھ سی ایم کیا بنے کہ ان کو خوش کرنے کے لئے افسر سب کچھ بھگوارنگ میں رنگ رہے ہیں۔پیلی بھیت ضلع میں تقریباً 100پرائمری اسکولوں پر بھگوا پینٹ کروا دیا گیا ہے۔یہ باقاعدہ ایک سرکاری سرکلر جاری کرکے کیا گیا۔اس پر تنازعہ ہونے پر اب اسکول دوبارہ سفید رنگ کیا جائے گا۔گاؤں کے لوگوں کا کہنا ہے کہ احتجاج کے باوجود سر پنچ نے ان اسکولوں کو رنگوا دیا۔بتا دیں کہ اتر پردیش کی یوگی آدتیہ ناتھ حکومت نے ایک اور متنازعہ فیصلہ لیا ہے۔ریاست کے تمام اسکولوں میں ’بھگود گیتا‘پر مبنی گانا مقابلہ کرانے کی ہدایات بھیجی گئی ہیں۔حکام نے بتایا کہ ان مقابلوں کے نتائج کی بنیاد پر اس ماہ کے آخر میں دارالحکومت لکھنؤ میں ریاستی سطح کا ایک مقابلہ منعقد کیا جائے گا۔ریاست کے ثانوی محکمہ تعلیم کے تمام چیمبرز کے مشترکہ ڈائریکٹرز کو یقینی بنانے کے لئے کہا گیا ہے کہ تمام بورڈز کے تحت آنے والے سرکاری اور نجی اسکولوں میں ضلع اور ریاستی سطح پر یہ مقابلے منعقدکیے جائیں۔
