بنگلورو۔16؍جنوری(ایس او نیوز) ریاست بھر میں شاہراہوں پر ہونے والے سڑک حادثات اور دیگر جرائم پر نظر رکھنے اور ان کے انسداد کیلئے ریاستی حکومت نے تمام شاہراہوں پر گشتی گاڑیاں تعینات کرنے کا فیصلہ لیا ہے۔ جس کے تحت آج سو گشتی گاڑیوں کو وزیراعلیٰ سدرامیا نے ودھان سودھا کے روبرو ہری جھنڈی دکھائی۔وزیر اعلیٰ کے ہمراہ وزیر داخلہ ڈاکٹر جی پرمیشور بھی موجود تھے۔قومی شاہراہوں پر حفاظتی اقدامات سڑک حادثات کی صورت میں فوری مدد پہنچانے اور دیگر ضروریات کیلئے ایک سو انووا کاریں جدید ترین سہولیات سے لیس کرکے میدان میں اتاری گئی ہیں۔ بجز بنگلور ریاست کے تحت اضلاع میں ہر 30 تا 40کلومیٹر کی مسافت پر ایک گاڑی متعین کی جائے گی۔ اگلے دنوں میں ان گاڑیوں کی تعداد میں مزید اضافہ کیا جائے گا اور ہر گاڑی کے درمیان فرق کو 20 کلو میٹر کردیا جائے گا۔ان گشتی گاڑیوں میں 360 ڈگری کیمرہ ، ٹچ اسکرین مانیٹر ، ہنگامی طبی امداد کٹ، آگ بجھانے کے آلات ، سرچ لائٹ ، انورٹر، اور دیگر سہولیات دستیاب رہیں گی۔ پندرہ کروڑ روپیوں کی لاگت پر یہ گاڑیاں خریدی گئی ہیں۔ان گاڑیوں کی گشت کیلئے 33الگ الگ شاہراہوں کو چنا گیا ہے۔اگلے تین سالوں کے دوران ان گشتی گاڑیوں کی تعداد کو بڑھا کر 300 کیا جائے گا۔سڑک حادثات کی صورت میں فوری طبی ا مداد پہنچانا ،اور زخمیوں کو فوری طور پر قریبی اسپتال پہنچانا اولین ذمہ داری قرار دی گئی ہے۔ ساتھ ہی شاہراہوں پر ٹریفک ضوابط کی نگرانی کا ذمہ بھی ان گاڑیوں کے سپرد رہے گا۔ وزیر اعلیٰ سدرامیا نے اس موقع پر خطاب کرتے ہوئے کہاکہ ان گاڑیوں کے ذریعہ ریاست بھر میں پولیس جوان ٹریفک قوانین کے متعلق بیداری لانے کی کوشش کریں۔ ہنگامی حالات میں انہی گاڑیوں کے ذریعہ زخمیوں کو اسپتال پہنچانے کی طرف بھی توجہ دی جائے ۔ اس موقع پر وزیر اعلیٰ کے ہمراہ وزیر داخلہ ڈاکٹر جی پرمیشور ، چیف سکریٹری سبھاش کنٹیا ، وزیر داخلہ کے مشیر کیمپیا ، اڈیشنل ڈائرکٹر جنرل پولیس اے ایم پرساد ، شہر کے پولیس کمشنر پروین سود اور دیگر موجود تھے۔