ಹೊನ್ನಾವರ: ತಾಲೂಕಿನ ವಿವಿಧ ಭಾಗಗಳಲ್ಲಿನ ಭತ್ತದ ಗದ್ದೆಗಳಿಗೆ ಕಾಡು ಹಂದಿಗಳ ಹಾವಳಿ ವಿಪರೀತವಿದ್ದು, ತಂಡೋಪತಂಡವಾಗಿ ಬರುವ ಹಂದಿಗಳ ಗುಂಪು ಅನೇಕ ರೈತರ ಭತ್ತದ ಗದ್ದೆಗಳನ್ನು ನಾಶಪಡಿಸಿ, ರೈತರ ನಿದ್ದೆಗೆಡಿಸಿದೆ.
ತಾಲೂಕಿನ ಗೇರುಸೊಪ್ಪಾ, ಕುದ್ರಗಿ, ಗುಂಡಿಬೈಲು, ಹಾಡಗೇರಿ, ಚಿಕ್ಕನಕೋಡು, ಚಂದಾವರ, ತೊರಗೋಡು, ತುಳಸಾಣಿ, ಕಾನಕ್ಕಿ, ಅಠಾಟ, ಕಡ್ನೀರು, ಹೊದ್ಕೆ ಶಿರೂರು ಸೇರಿದಂತೆ ಹಲವು ಗ್ರಾಮೀಣ ಪ್ರದೇಶಗಳಲ್ಲಿ ಹಂದಿಗಳ ಹಾವಳಿ ಹೆಚ್ಚಾಗಿರುವುದು ಕಂಡುಬಂದಿದೆ.
ಹಕ್ಕಿ-ಪಕ್ಷಿಗಳ ಉಪಟಳ: ಇನ್ನು ಕಾಡುಪ್ರಾಣಿಗಳ ಕಾಟ ಒಂದೆಡೆಯಾದರೆ ರೈತರಿಗೆ ಹಕ್ಕಿ-ಪಕ್ಷಿಗಳ ಕಾಟ ಪ್ರತೀ ವರ್ಷವೂ ತಪ್ಪಿದ್ದಲ್ಲ. ಆದರೆ ಈ ಬಾರಿ ಬೇರೆಡೆಯಿಂದ ವಲಸೆ ಬರುವ ನೂರಾರು ಗಿಳಿಗಳ ಗುಂಪು ಭತ್ತದ ತೆನೆಗಳನ್ನು ಕತ್ತರಿಸಿ ಮರದಲ್ಲಿ ಕೊಂಡೊಯ್ದು ತಿನ್ನುವ ಕಾಟವೂ ಹೆಚ್ಚಾಗಿದೆ. ಇದರಿಂದ ಕುಟುಂಬದ ಸದಸ್ಯರಿಗೆ ಹಗಲು-ರಾತ್ರಿ ಎನ್ನದೆ ಹೊಲ ಕಾಯಲು ಮುಂದಾಗಿದ್ದಾರೆ.