ಭಟ್ಕಳ: ನಾನು ಭಾರತೀಯ ಪ್ರಜೆಯಾಗಿದ್ದು ಭಾರತೀಯ ನ್ಯಾಯಾಂಗ ವ್ಯವಸ್ಥೆಯಲ್ಲಿ ಅಪಾರ ನಂಬಿಕೆಯಿದ್ದು ನಮ್ಮ ದೇಶದ ನ್ಯಾಯಾ ವ್ಯವಸ್ಥೆಯ ಬಗ್ಗೆ ನನಗೆ ಹೆಮ್ಮೆ ಪಡುವಂತಾಗಿದೆ ಎಂದು ೨೦೦೮ ರಿಂದ ಭಯೋತ್ಪಾನ ಚಟುವಟಿಕೆಗಳಲ್ಲಿ ಭಾಗವಹಿಸಿದ್ದರು ಎಂಬ ಆರೋಪ ಹೊತ್ತು ೯ ವರ್ಷಗಳ ಜೈಲಿನಲ್ಲಿ ಕಳೆದು ಸೋಮವಾರ ಸಂಜೆ ಎಲ್ಲ ಪ್ರಕರಣಗಳಿಂದ ಮುಕ್ತಗೊಂಡು ನ್ಯಾಯಾಲಯದಿಂದ ಬಿಡುಗಡೆಗೊಂಡ ಭಟ್ಕಳದ ಮೌಲಾನ ಶಬ್ಬೀರ್ ಗಂಗೋಳಿ ಹೇಳಿದರು. 
ಅವರು ಮಂಗಳವಾರ ಭಟ್ಕಳದಲ್ಲಿ ಪತ್ರಿಕಾಗೋಷ್ಟಿಯಲ್ಲಿ ಮಾತನಾಡುತ್ತಿದ್ದರು. 
ಜೈಲಿನಲ್ಲಿ ಕಳೆದ ಆ ೯ ವರ್ಷಗಳ ನರಕಯಾತನೆಯನ್ನು ಮಾಧ್ಯಮದೆದುರೆ ಬಿಚ್ಚಿಟ್ಟ ಶಬ್ಬಿರ್ ಆ ಕರಾಳ ಭಯಾನಕತೆಯನ್ನು ನಾನು ಹೇಗೆ ವಿವರಿಸಲಿ ಎಂದರು. ಕೇವಲ ನಾನೋಬ್ಬ ಮೌಲ್ವಿ ಹಾಗೂ ಭಟ್ಕಳದ ಮುಸ್ಲಿಮ ಸಮುದಾಯಕ್ಕೆ ಸೇರಿದ ಒಂದೇ ಒಂದು ಕಾರಣಕ್ಕಾಗಿ ನನಗೆ ನೀಡಬಾರದ ಚಿತ್ರಹಿಂಸೆಯನ್ನು ನೀಡಿದರು. ಗುಪ್ತಾಂಗಳನ್ನು ಬಿಡದೆ ಹಿಂಸಿಸಿದರು. ವ್ಯಕ್ತಿ ಅತ್ತ ಸಾಯಲು ಬಾರದು ಇತ್ತಬದುಕಲು ಬಿಡಬಾರದು ಎಂಬ ಒಂದೇ ದೋರಣೆಯಿಂದ ಪೊಲೀಸರು ನೀಡುವ ಆ ಚಿತ್ರಹಿಂಸೆ ನೆನಪು ಮಾಡಿಕೊಂಡರೆ ದೇಹದ ರೋಮಗಳು ಕೂಡ ನಡುಗಲು ಆರಂಭಿಸುತ್ತವೆ ಎಂದ ಅವರು ಅಲ್ಲಿನ ಭಯಾನಕ ಚಿತ್ರಣವನ್ನು ಕಣ್ಣಿಗೆ ಕಟ್ಟುವಂತೆ ವಿವರಿಸಿದರು. ನನಗೆ ಯಾವುದೇ ಸಂಬಂಧವಿಲ್ಲದ ಪ್ರಕರಣವೊಂದರಲ್ಲಿ ಫಿಕ್ಸ್ ಮಾಡಿದ ಪೂನಾದ ಎಟಿ‌ಎಸ್ ನವರು ಕೊನೆಯವರೆಗೂ ನನ್ನನ್ನು ಬಿಡದೆ ಚಿತ್ರಹಿಂಸೆ ನೀಡಿದ್ದಾರೆ. ಈಗ ಈ ದೇಶದ ಕಾನೂನು ನನಗೆ ನ್ಯಾಯಾ ನೀಡಿದೆ. ಕೆಳಮಟ್ಟದ ನ್ಯಾಯಾಲಯಗಳಲ್ಲಿ ನ್ಯಾಯಾ ಸಿಗದೆ ಇರಬಹುದು ಆದರೆ ಉನ್ನತ ನ್ಯಾಯಾಲಯಗಳಲ್ಲಿ ನ್ಯಾಯಾ ಈಗಲು ಜೀವಂತವಿದೆ ಎನ್ನುವುದಕ್ಕೆ ನಾನೇ ಸಾಕ್ಷಿಯಾಗಿದ್ದೇನೆ. ನಾನು ಭಾರತೀಯನೆಂಬ ನೆಲೆಯಲ್ಲಿ ಈ ನೆಲದ ಕಾನೂನಿ ಮೇಲೆ ಅಪಾರ ನಂಬಿಕೆ, ಗೌರವ ಇಟ್ಟುಕೊಂಡಿದ್ದೇನೆ. ನಮ್ಮ ದೇಶದ ಕಾನೂನಿನ ಮೇಲೆ ನನಗೆ ಹೆಮ್ಮೆಯೂ ಇದೆ.ಈ ದೇಶದದ ಮುಸ್ಲಿಮ ಯುವಕರು ಮತ್ತು ತಾವು ಮಾಡದ ತಪ್ಪಿಗಾಗಿ ಜೈಲು ಶಿಕ್ಷೆ ಅನುಭವಿಸುತ್ತಿರುವ ಎಲ್ಲರಿಗೆ ಒಂದು ದಿನ ನ್ಯಾಯಾ ಸಿಗುತ್ತದೆ ಎಂದ ವಿಶ್ವಾಸವೂ ನನಗಿದೆ ಎಂದರು. ನನ್ನ ಮುಸ್ಲಿಮ ಸಹೋದರರಿಗೆ ನಾನು ಹೇಳುವುದಿಷ್ಟೆ ನಮ್ಮ ಜೀವನವನ್ನು ಎಲ್ಲ ಕೆಡುಕುಗಳಿಂದ ಮುಕ್ತವಾಗಿಸಿಕೊಂಡು ಬದುಕಬೇಕು, ಭಯೋತ್ಪಾದನೆ ಮತ್ತದರ ಚಟುವಟಿಕೆಗಳತ್ತ ಸುಳಿಯದೆ ತಮ್ಮ ಜೀವನವನ್ನು ನಡೆಸಿ ಎಂದು ಅವರು ಸಮುದಾಯದ ಯುವಕರಿಗೆ ಕರೆ ನೀಡಿದರು. 
ಪೊಲೀಸರು ಯಾವ ಪ್ರಕರಣದಲ್ಲಿ ನಿಮ್ಮನ್ನು ಬಂಧಿಸಿದರು ಎಂಬ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ಮೌಲಾನ ಶಬ್ಬಿರ್ "ಪೂನಾದ ಮಸೀದಿಯೊಂದರಲ್ಲಿ ನಮಾಜ್ ನಿರ್ವಹಿಸುವ ಕೆಲಸ ಮಾಡುತ್ತಿದ್ದ ನನ್ನನ್ನು ರಾತ್ರಿ ಒಂದು ಗಂಟೆಯ ಸಮಯ ಎಟಿ‌ಎಸ್ ನವರು ಮಸೀದಿಯನ್ನು ಸುತ್ತುವರೆದು ನಿಂತುಕೊಂಡು ನನ್ನನ್ನು ಹಾಗೂ ನನ್ನ ಭಾವನನ್ನು ಬಂಧಿಸಿದರು. ಯಾರು ಏಕೆ ಎಲ್ಲಿಗೆ ಎಂದು ಕೇಳುವ ಸಮಯವನ್ನು ನೀಡದೆ ಅವರು ನನ್ನನ್ನೂ ಯಾವುದೋ ಅಜ್ಞಾತ ಸ್ಥಳಕ್ಕೆ ಕರೆದುಕೊಂಡು ಹೋದರು ಅಲ್ಲಿ ರಾತ್ರಿಯಿಡಿ ಹೊಡೆದರು. ಚಿತ್ರಹಿಂಸೆ ನೀಡಿದರು. ಗುಪ್ತಾಂಗಗಳಲ್ಲಿ ಒಂದು ರೀತಿಯ ಕೆಮಿಕಲ್ ಹಾಕಿ ಹಿಂಸಿಸಿದರು. ನನ್ನನ್ನು ಭಯೋತ್ಪಾದನೆ ಆರೋಪದಡಿ ಪ್ರಕರಣ ದಾಖಲಿಸಿದರು ಯಾವುದೇ ಸಾಕ್ಷ್ಯ ದೊರೆಯದಾದಾಗ ನಕಲಿ ನೋಟು ಸಾಗಾಟದ ಸುಳ್ಳು ಪ್ರಕರಣ ಸೃಷ್ಟಿಸಿ ಸರ್ಕಾರಿ ಅಧಿಕಾರಿಯೇ ನನ್ನ ವಿರುದ್ಧ ಸಾಕ್ಷ್ಯ ನುಡಿದು ಜೈಲಿಗಟ್ಟಿದ್ದರು. ಎಲ್ಲರ ಪ್ರಕರಣಗಳಿಂದ ಹಾಗೂ ಜೈಲಿನ ನರಕಮಯ ಯಾತನೆಯಿಂದ ಈಗ ಮುಕ್ತಿಹೊಂದಿದ್ದೇನೆ ಎಂದು ಅವರು ಮಾಧ್ಯಮಗಳಿಗೆ ವಿವರಿಸಿದರು.
ಈ ಸಂದರ್ಭದಲ್ಲಿ ಎಪಿಸಿ‌ಆರ್ ನಾಗರೀಕ ಹಕ್ಕು ಸಂರಕ್ಷಣಾ ಸಂಸ್ಥೆಯ ಜಿಲ್ಲಾಧ್ಯಕ್ಷ ಖಮರುದ್ದೀನ್ ಮಷಾಯಿಕ್, ಮೌಲಾನ ಸೈಯ್ಯದ್ ಝುಬೈರ್, ನ್ಯಾಯವಾದಿ ಅರ್ಷದ್ ಆಹ್ಮದ್ ಬಾಳೂರು ಉಪಸ್ಥಿತರಿದ್ದರು.