ಭಟ್ಕಳ; ಕಳೆದ ಮೂರು ದಿನಗಳಿಂದ ಇಲ್ಲಿನ ನ್ಯೂ ಇಂಗ್ಲಿಷ್ ಶಾಲಾ ಮೈದಾನದಲ್ಲಿ ನಡೆಯುತ್ತಿರುವ ಪ್ರಾಥಮಿಕ ಹಾಗೂ ಪ್ರೌಢಶಾಲಾ ಬಾಲಕ ಬಾಲಕೀಯರ ರಾಜ್ಯಮಟ್ಟದ ಹೊನಲು ಬೆಳಕಿನ ಥ್ರೋಬಾಲ್ ಪಂದ್ಯಾವಳಿ ಸೋಮವಾರ ರಾತ್ರಿ ತೆರೆಕಂಡಿತು.
ಉ.ಕ.ಜಿಲ್ಲಾಡಳಿತ ಜಿ.ಪಂ, ಉಪನಿರ್ದೇಶಕರ ಕಾರ್ಯಾಲಯ. ಸಾರ್ವಜನಿಕ ಶಿಕ್ಷಣ ಇಲಾಖೆ ಉತ್ತರ ಕನ್ನಡ, ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಾರ್ಯಾಲಯ ಭಟ್ಕಳ ಇವರ ಸಂಯುಕ್ತಾಶ್ರಯದಲ್ಲಿ ರಾಜ್ಯ ಮಟ್ಟದ ೧೪ ಹಾಗೂ ೧೭ ವರ್ಷ ವಯೋಮಾನದ ವಿದ್ಯಾರ್ಥಿಗಳ ಮೂರು ದಿನಗಳ ಥ್ರೋಬಾಲ್ ಪಂದ್ಯಾವಳಿ ಆಯೋಜಿಸಿಲಾಗಿತ್ತು.
ಸಮಾರೋಪ ಸಮಾರಂಭಮುಖ್ಯ ಅತಿಥಿಯಾಗಿ ಉಪಸ್ಥಿತರಿದ್ದ ಸಿ.ಪಿ.ಐ. ಸುರೇಶ ನಾಯಕ ಮಾತನಾಡಿ, ಭಟ್ಕಳ ನಗರದಲ್ಲಿ ರಾಜ್ಯಮಟ್ಟದ ಇಲಾಖಾ ಕ್ರೀಡಾಕೂಟ ಅತ್ಯಂತ ವ್ಯವಸ್ಥಿತವಾಗಿ ಜರಗಿದೆ. ಇದಕ್ಕೆ ಶಿಕ್ಷಣ ಇಲಾಖೆ ಅಧಿಕಾರಿಗಳ ಶ್ರಮ ಹಾಗೂ ಇಲ್ಲಿನ ದೈಹಿಕ ಶಿಕ್ಷಕರು ಶ್ರಮ ಸ್ಮರಣೀಯವಾದುದು. ಯಾವುದೇ ಕಾರಣಕ್ಕೂ ಸೋಲು ಗೆಲುವುನ್ನು ಸಮಾನವಾಗಿ ಸ್ವೀಕರಿಸುವ ಮನೋಭಾವನೆ ವಿದ್ಯಾರ್ಥಿಗಳಲ್ಲಿ ಬೆಳೆಯಬೇಕು. . ಈ ಥ್ರೋಬಾಲ್ ಪಂದ್ಯದಲ್ಲಿ ವಿಜೇತರಾದವರು ರಾಷ್ಟ್ರ, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆಗೈಯಲಿ ಎಂದು ಹಾರೈಸಿದರು.
ಭಟ್ಕಳ ತಾ.ಪಂ. ಸ್ಥಾಯಿ ಸಮಿತಿ ಅಧ್ಯಕ್ಷ ವಿಷ್ಣು ದೇವಾಡಿಗ ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
ವಿಜೇತ ತಂಡದ ಬಾಲಕ ಬಾಲಕೀಯರು ಹಾಗೂ ತರಬೇತುದಾರರಿಗೆ ಶಾಲು ನೀಡಿ ಸನ್ಮಾನಿಸಲಾಯಿತು.
ಕ್ಷೇತ್ರ ಶಿಕ್ಷಣಾಧಿಕಾರಿ ವೆಂಕಟೇಶ ಪಟಗಾರ ಸ್ವಾಗತಿಸಿದರು. ಶ್ರೀಧರ ಶೇಟ್ ಶಿರಾಲಿ ಕಾರ್ಯಕ್ರಮದ ನಿರೂಪಿಸಿದರು. ಜಿ.ವಿ.ನಾಯ್ಕ. ವಂದನಾರ್ಪಣೆಯನ್ನು ಸಲ್ಲಿಸಿದರು.
ವೇದಿಕೆಯಲ್ಲಿ ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಎಂ.ಬಿ.ನಾಯ್ಕ. ಆರ್.ಎಚ್.ನಾಯ್ಕ, ಎಂ.ಕೆ.ನಾಯ್ಕ ಮತ್ತಿತರರು ಉಪಸ್ಥಿತರಿದ್ದರು.
ಫಲಿತಾಂಶ:
೧೪ ವರ್ಷ ವಯೋಮಾನ- ಬಾಲಕರ ವಿಭಾಗ.
ಪ್ರಥಮ ಸ್ಥಾನ - ಬೆಂಗಳೂರು ವಿಭಾಗ ತಂಡ. ದ್ವಿತೀಯ ಸ್ಥಾನ - ಬೆಳಗಾವಿ ವಿಭಾಗ ತಂಡ.
ಬಾಲಕಿಯರ ವಿಭಾಗ: ಪ್ರಥಮ ಸ್ಥಾನ - ಮೈಸೂರು ವಿಭಾಗ ತಂಡ. ದ್ವಿತೀಯ ಸ್ಥಾನ- ಬೆಂಗಳೂರು ವಿಭಾಗ ತಂಡ.
೧೭ ವರ್ಷದ ವಯೋಮಾನ- ಬಾಲಕರ ವಿಭಾಗ:
ಪ್ರಥಮ ಸ್ಥಾನ - ಬೆಂಗಳೂರು ತಂಡ. ದ್ವಿತೀಯ ಸ್ಥಾನ, ಗುಲಬರ್ಗಾ ವಿಭಾಗ ತಂಡ.
ಬಾಲಕಿಯರ ವಿಭಾಗ: ಪ್ರಥಮ ಸ್ಥಾನ - ಮೈಸೂರು ವಿಭಾಗ ತಂಡ. ದ್ವಿತೀಯ ಸ್ಥಾನ - ಬೆಂಗಳೂರು ವಿಭಾಗ ತಂಡ.