ಶ್ರೀನಿವಾಸಪುರ: ಪುರಸಭೆಯ ನಡಾವಳಿ ಪುಸ್ತಕ ಹಾಜರು ಪಡಿಸದ ಕಾರಣ ವಿರೋಧ ಪಕ್ಷದ ಸಭಾತ್ಯಾಗ, ನಗರೋತ್ಥಾನ ಯೋಜನೆಯಡಿ ಅಭಿವೃದ್ಧಿ ಕಾಮಗಾರಿ ಕೈಗೊಳ್ಳುವ ವಿಷಯದಲ್ಲಿ ಆಡಳಿತ ಹಾಗೂ ವಿರೋಧ ಪಕ್ಷದ ಸದಸ್ಯರ ನಡುವ ವಾಗ್ವಾದ, ಮುಸಾಫರ್‌ ಖಾನಾ ವಾಣಿಜ್ಯ ಕಟ್ಟಡದ ಅಂಗಡಿ ಮಳಿಗೆಗಳನ್ನು ಹರಾಜು ಹರಾಜು ಹಾಕಲು ಒಪ್ಪಿಗೆ. ಇವಿಷ್ಟು ಪುರಸಭೆ ಕಚೇರಿ ಸಭಾಂಗಣದಲ್ಲಿ ಮಂಗಳವಾರ ಏರ್ಪಡಿಸಿದ್ದ ಪುರಸಭೆಯ ಸರ್ವ ಸದಸ್ಯರ ಸಾಮಾನ್ಯ ಸಭೆಯ ಮುಖ್ಯಾಂಶಗಳು.

ಸಭೆ ಪ್ರಾರಂಭವಾಗುತ್ತಿದ್ದಂತೆ, ವಿರೋಧ ಪಕ್ಷವಾದ ಜೆಡಿಎಸ್‌ ಸದಸ್ಯರು ನಗರೋತ್ಥಾನ ಯೋಜನೆಯಡಿ ತಮ್ಮ ವಾರ್ಡ್‌ಗಳಲ್ಲಿ ಕಾಮಗಾರಿ ಕೈಗೊಳ್ಳಬೇಕು ಎಂದು ಆಗ್ರಹಪಡಿಸಿದರು. ಆಡಳಿತ ಪಕ್ಷದ ಸದಸ್ಯ ಬಿ.ಎಂ.ಪ್ರಕಾಶ್‌ ಮಾತನಾಡಿ, ಅಭಿವೃದ್ಧಿ ವಿಷಯದಲ್ಲಿ ಕಚ್ಚಾಟ ಬೇಡ. ಸಮಸ್ಯೆ ಇರುವ ಕಡೆ, ಮುಖ್ಯವಾಗಿ ಹೊಸ ಬಡಾವಣೆಗಳಲ್ಲಿ ಅಭಿವೃದ್ದಿ ಕಾಮಗಾರಿ ಕೈಗೊಳ್ಳಲು ಆಧ್ಯತೆ ನೀಡಿ ಎಂದು ಹೇಳಿದರು.

ಪುರಸಭೆಯ ಉಪಾಧ್ಯಕ್ಷ ಟಿ.ಎಂ.ಬಿ ಮುಕ್ತಿಯಾರ್‌ ಮಧ್ಯ ಪ್ರವೇಶಿಸಿ ಯಾವುದೇ ಕಾಮಗಾರಿ ಕೈಗೊಳ್ಳುವ ಮುನ್ನ, ಆಯಾ ವಾಡ್ಡ್‌ನ ಸದಸ್ಯರ ಅಭಿಪ್ರಾಯ ಕೇಳಿ, ಅವರು ಹೇಳಿದ ಕಡೆ ಕಾಮಗಾರಿ ಪ್ರಾರಂಭಿಸಿ ಎಂದು ಅಧಿಕಾರಿಗಳಿಗೆ ಸೂಚಿಸಿದರು.

ಸಭೆಯ ಸೂಚನಾ ಪತ್ರದಲ್ಲಿ ಹಿಂದಿನ ಸಭೆಯ ನಡವಳಿಕೆಗಳನ್ನು ಓದಿ ದಾಖಲಿಸುವ ವಿಚಾರ ಬಂದಾಗ, ಜೆಡಿಎಸ್‌ ಸದಸ್ಯರಾದ ಶ್ರೀನಿವಾಸಪ್ಪ, ಇಮ್ರಾನ್‌ ಪಾಷ, ರಾಘವರೆಡ್ಡಿ ಸಭೆಯಲ್ಲಿ ನಡಾವಳಿ ಪುಸ್ತಕ ಹಾಜರುಪಡಿಸುವಂತೆ ಆಗ್ರಹಿಸಿದರು. ನಡಾವಳಿ ಪುಸ್ತಕ ಅಧ್ಯಕ್ಷರ ಬಳಿಯಿದೆ ಎಂದು ಹೇಳಿದಾಗ, ಕೆಂಡಾ ಮಂಡಲವಾದ ಅವರು, ಅದನ್ನು ವಿರೋಧಿಸಿ ಇತರ ಸದಸ್ಯರೊಂದಿಗೆ ಸಭೆಯಿಂದ ಹೊರ ನಡೆದರು.

ಈ ಘಟನೆಯಿಂದ ಬೇಸರಗೊಂಡ ಆಡಳಿತ ಪಕ್ಷದ ಸದಸ್ಯ ಬಿ.ಎಂ.ಪ್ರಕಾಶ್, ಎಲ್ಲದಕ್ಕೂ ಪಕ್ಷದ ಹೆಸರಲ್ಲಿ ಬಾಯಿ ಮುಚ್ಚಿಕೊಂಡು ಕುಳಿತುಕೊಳ್ಳಲು ಸಾಧ್ಯವಿಲ್ಲ. ಸಭೆಯಲ್ಲಿ ನಡಾವಳಿ ಪುಸ್ತಕ ಹಾಜರು ಪಡಿಸಲು ಆಗುವುದಿಲ್ಲ ಎಂದರೆ ಹೇಗೆ? ಎಂದು ಗುಡುಗಿದರು.

ಸಭೆಗೆ ನಡಾವಳಿ ಪುಸ್ತಕ ತಂದ ಬಳಿಕ, ಪುರಸಭೆಯ ಮುಖ್ಯಾಧಿಕಾರಿ ವಿ.ಸತ್ಯನಾರಾಯಣ, ಸಭಾತ್ಯಾಗ ಮಾಡಿದ್ದ ವಿರೋಧ ಪಕ್ಷದ ಸದಸ್ಯರ ಮನವೊಲಿಸಿ ಸಭೆಗೆ ಕರೆತಂದರು.

ನಂತರ ಯಾವುದೇ ಸಮಸ್ಯೆ ಇಲ್ಲದೆ ನಡೆದ ಸಭೆಯಲ್ಲಿ, ಸ್ಥಾಯಿ ಸಮಿತಿ ಸದಸ್ಯರನ್ನು ಆಯ್ಕೆ ಮಾಡಲು, ಪುರಸಭೆ ಲೆಕ್ಕ ತಪಾಸಣೆ ಶುಲ್ಕ ಪಾವತಿಸಲು, ವಿವಿಧ ತೆರಿಗೆಗಳನ್ನು ಸರ್ಕಾರಕ್ಕೆ ಪಾವತಿಸಲು, ಶುದ್ಧ ಕುಡಿಯುವ ನೀರು ಘಟಕಗಳನ್ನು ಸ್ಥಾಪಿಸಲು ಜಿಲ್ಲಾಧಿಕಾರಿಗೆ ಪ್ರಸ್ತಾವನೆ ಸಲ್ಲಿಸಲು ಅನುಮೋದನೆ ನೀಡಲಾಯಿತು.

ಪುರಸಭೆ ವ್ಯಾಪ್ತಿಯಲ್ಲಿ ನೀರು ಸರಬರಾಜು ವ್ಯವಸ್ಥೆ ಸುಧಾರಿಸಲು, ನೀರು ಸರಬರಾಜು ವ್ಯವಸ್ಥೆಯನ್ನು ನಗರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿಗೆ ವಹಿಸುವ ಬಗ್ಗೆ ಚರ್ಚಿಸಲಾಯಿತು. ಪಟ್ಟಣದ ಸುತ್ತಲಿನ ರಸ್ತೆಗಳನ್ನು ಕಸಮುಕ್ತ ರಸ್ತೆಗಳನ್ನಾಗಿ ಘೋಷಣೆ ಮಾಡಿ, ಸಿಸಿ ಕ್ಯಾಮೆರಾ ಅಳವಡಿಸಲು, ಕಸ ವಿಂಗಡಣೆ ಕುರಿತು ಸಾರ್ವಜನಿಕರಿಗೆ ಅರಿವು ಮೂಡಿಸಲು ನಿರ್ಣಯಿಸಲಾಯಿತು.

ಹಳೆ ಪುರಸಭೆ ಕಟ್ಟಡದ ಮುಂಭಾಗದಲ್ಲಿ ಅಶ್ವತ್ಥಕಟ್ಟೆ ನಿರ್ಮಿಸಲು, ನಿಧಿ ಪಾವತಿ ಅನುಮೋದಿಸಲು, ಪಟ್ಟಣದ ಮುಖ್ಯ ರಸ್ತೆಗಳಲ್ಲಿ ಸಿಸಿ ಕ್ಯಾಮೆರಾ ಅಳವಡಿಸಲು, ಪೌರಕಾರ್ಮಿಕರಿಗೆ ಗೃಹ ಭಾಗ್ಯ ಯೋಜನೆಯಡಿ ಮನೆ ನಿರ್ಮಸಿಕೊಡಲು, ಅಂಗಡಿ ಮಳಿಗೆ ಹರಾಜು ಮಾಡಲು ಜಿಲ್ಲಾಧಿಕಾರಿಗಳ ಅನುಮೋದನೆ ಪಡೆಯಲು ಒಪ್ಪಿಗೆ ಸೂಚಿಸಲಾಯಿತು.

ಮುಸಾಫರ್‌ ಖಾನಾ ಪ್ರದೇಶದಲ್ಲಿ ನಿರ್ಮಿಸಲಾಗಿರುವ ವಾಣಿಜ್ಯ ಕಟ್ಟಡದಲ್ಲಿನ ಅಂಗಡಿ ಮಳಿಗೆಗಳನ್ನು ನಿಯಮಾನುಸಾರ ಹರಾಜು ಹಾಕಲು ಹಾಗೂ ತಾಲ್ಲೂಕು ಪತ್ರಕರ್ತರ ಸಂಘದ ಕಟ್ಟಡಕ್ಕೆ ನಿವೇಶನ ಒದಗಿಸಲು ಸಭೆ ಒಪ್ಪಿಗೆ ಸೂಚಿಸಿತು. ಒಟ್ಟಾರೆ ಸೂಚನಾ ಪತ್ರದಲ್ಲಿದ್ದ 47 ಅಂಶಗಳ ಪೈಕಿ 46ವಿಷಯಗಳ ಬಗ್ಗೆ ಸಭೆಯಲ್ಲಿ ಚರ್ಚಿಸಿ ಅನುಮೋದನೆ ಪಡೆಯಲಾಯಿತು.

ಸದಸ್ಯರಾದ ಸತ್ಯನಾರಾಯಣ, ವಿ.ಶಂಕರ್‌, ರಾಘವರೆಡ್ಡಿ, ಮುನಿರಾಜು, ಜಯಣ್ಣ, ರಮೇಶ್‌, ವೆಂಕಟೇಶರೆಡ್ಡಿ, ಇಮ್ರಾನ್‌ ಪಾಷ, ಶಬ್ಬೀರ್‌, ಏಜಾಜ್‌ ಪಾಷ, ಶ್ರೀನಿವಾಸರೆಡ್ಡಿ, ಬಿ.ಎಂ.ಪ್ರಕಾಶ್‌, ಪದ್ಮಾವತಿ, ಕಲಾವತಿ ಚರ್ಚೆಯಲ್ಲಿ ಭಾಗವಹಿಸಿದ್ದರು.

ಮುಖ್ಯಾಧಿಕಾರಿ ವಿ.ಸತ್ಯನಾರಾಯಣ, ಅಧಿಕಾರಿಗಳಾದ ಗಂಗಿರೆಡ್ಡಿ, ಶ್ರೀನಿವಾಸ್‌, ಕೆ.ಜಿ.ರಮೇಶ್‌, ರೇಣುಕಾ, ದೀಪಾ ಇದ್ದರು.