ಕೋಲಾರ: ಗ್ರಾಮೀಣ ಮತ್ತು ನಗರ ಪ್ರದೇಶದ ಬಡ ಕೂಲಿಕಾರ್ಮಿಕರನ್ನು ಮತ್ತು ಯುವ ಜನರನ್ನು ಆತ್ಮಹತ್ಯೆಗೆ ಹಾಗೂ ಅವರ ಕುಟುಂಬಗಳನ್ನು ಬೀದಿಪಾಲು ಮಾಡುವ ಐ.ಪಿ.ಎಲ್. ಬೆಟ್ಟಿಂಗ್ ದಂದೆಗೆ ಕಡಿವಾಣ ಹಾಕಿ, ಬೆಟ್ಟಿಂಗ್ ನಡೆಸುವ ದಂದೆಕೋರರ ವಿರುದ್ಧ ಗೂಂಡಾಕಾಯ್ದೆಯಡಿಯಲ್ಲಿ ಕೇಸು ದಾಖಲಿಸಿ, ಬೆಟ್ಟಿಂಗ್ ದಂದೆಯಿಂದ ಯುವ ಜನತೆ ಹಾಳಾಗದಂತೆ ಕ್ರಮ ವಹಿಸಬೇಕೆಂದು ರೈತ ಸಂಘದಿಂದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ  ಮನವಿ ನೀಡಿ, ಆಗ್ರಹಿಲಾಯಿತು.

ರಾಜ್ಯ ಉಪಾಧ್ಯಕ್ಷ ಕೆ.ನಾರಾಯಣಗೌಡ ಮಾತನಾಡಿ  ಐ.ಪಿ.ಎಲ್. ಕ್ರಿಕೆಟ್ ಆಟ ಮೇಲ್ನೋಟಕ್ಕೆ ಮನರಂಜನೆ ಆಟದಂತೆ ಕಾಣುತ್ತಿದ್ದರೂ ಇತ್ತೀಚೆಗೆ ಬಂದ ಬ್ಲೂವೆಲ್ ಗೇಮ್‍ಗಿಂತ ಮಾರಕವಾದ ಆಟ ಇದಾಗಿದೆ. ಬ್ಲೂವೆಲ್ ಆಟದಲ್ಲಿ ಸಾವು ಕಾಣಿಸಿಕೊಂಡರೆ, ಈ ಐ.ಪಿ.ಎಲ್. ಆಟದ ಬೆಟ್ಟಿಂಗ್‍ನಲ್ಲಿ ಸಾವಿರಾರು ಕುಟುಂಬಗಳು ಬೀದಿಗೆ ಬೀಳುವ ಜೊತೆಗೆ ಯುವ ಪೀಳಿಗೆಯನ್ನು ಸಾಲ ಮಾಡಿ, ಬೆಟ್ಟಿಂಗ್ ಆಡಿ, ಗೆಲವು ಕಾಣದೆ ಸಾಲ ಹೆಚ್ಚಾಗಿ ಆತ್ಮಹತ್ಯೆಗೆ ಶರಣಾಗಿ ಅವರನ್ನೇ ನಂಬಿದ್ದ ಕುಟುಂಬಗಳು ಬೀದಿಪಾಲಾಗುವ ಜೊತೆಗೆ ಈ ದಂದೆ ಗ್ರಾಮೀಣ ಮತ್ತು ನಗರ ಪ್ರದೇಶದಲ್ಲೂ ಆವರಿಸಿದೆ. ರೈತರ ಕೂಲಿ ಕಾರ್ಮಿಕರ ಜಮೀನನ್ನು ಅಡ ಇಟ್ಟು, ಕಡೆಗೆ ತಮ್ಮ ಜೀವವನ್ನು ಕಳೆದುಕೊಳ್ಳುವ ಈ ಆಟಕ್ಕೆ ಕೋಲಾರ ಜಿಲ್ಲಾದ್ಯಂತ ಪ್ರತಿಷ್ಠಿತ ಬಾರ್ & ರೆಸ್ಟೋರೆಂಟ್‍ಗಳು, ಲಾಡ್ಜ್‍ಗಳು, ಸರ್ಕಾರಿ ಅರಣ್ಯ ಪ್ರದೇಶಗಳು, ಅಡ್ಡಗಳಾಗಿ ಪರಿಣಮಿಸುವ ಜೊತೆಗೆ ಮೊಬೈಲ್ ಮೂಲಕ ಬುಕ್ಕಿಗಳು, ಅಮಾಯಕರನ್ನು ಯಾಮಾರಿಸಿ ಈ ಮಾರಕವಾದ ಐ.ಪಿ.ಎಲ್. ಬೆಟ್ಟಿಂಗ್ ದಂದೆಗೆ ನೂಕಿ ಅವರ ಜೀನವನ್ನು ಸರ್ವನಾಶ ಮಾಡಲು ರೆಡಿಯಾಗಿರುವ ಐ.ಪಿ.ಎಲ್. ದಂದೆಗೆ ಕೆಲವೇ ಕೆಲವು ಅಧಿಕಾರಿಗಳು ಸಾತ್‍ನೀಡಿರುವುದು ಸತ್ಯವಾದ ಮಾತು. ಮಾರಕವಾಗಿರುವ ಈ ಬೆಟ್ಟಿಂಗ್ ದಂದೆಯಲ್ಲಿ ತೊಡಗಿರುವ ದಂದೆಕೋರರ ವಿರುದ್ಧ ಗೂಂಡಾಕಾಯ್ದೆಯಡಿಯಲ್ಲಿ ಕೇಸು ದಾಖಲಿಸಿ, ಜಿಲ್ಲೆಯಿಂದ ಗಡಿಪಾರು ಮಾಡಿ, ಅಮಾಯಕ ಯುವ ಪೀಳಿಗೆಯನ್ನು ರಕ್ಷಿಸಬೇಕೆಂದು ಆಗ್ರಹಿಸಲಾಯಿತು. 

ಐ.ಪಿ.ಎಲ್ ಪಿಡುಗು ಈಗಾಗಲೇ ಸಾಕಷ್ಟು ಯುವಕರನ್ನು ಸರ್ವನಾಶ ಮಾಡಿದೆ. ಈ ದಂದೆ ಒಂದು ವ್ಯವಸ್ಥಿತವಾಗಿ ದೊಡ್ಡಮಟ್ಟದಲ್ಲಿ ನಡೆಯುತ್ತಿದ್ದು, ಇದಕ್ಕೆ ಹೆಚ್ಚಾಗಿ ಬಲಿಯಾಗುತ್ತಿರುವುದು 16-30ವರ್ಷದ ಯುವಕರೇ ಹೆಚ್ಚಾಗಿದ್ದಾರೆ. ಬೆಟ್ಟಿಂಗ್ ದಂದೆಯ ಬಗ್ಗೆ ಪೋಷಕರ ಗಮನಕ್ಕೆ ಬಂದರೂ ಮಾರ್ಯಾದೆಗೆ  ಅಂಜಿ ಸುಮ್ಮನೆಯಿರುವಂತಾಗಿರುವದೇ ಈ ಕರಾಳ ದಂದೆ ಇನ್ನಷ್ಟು ವ್ಯಾಪಿಸಲು ಕಾರಣವಾಗಿದೆಂದು ತಿಳಿಸಿದರು. 

ಮನವಿ ಸ್ವೀಕರಿಸಿದ ಪೊಲೀಸ್ ವರಿಷ್ಠಾಧಿಕಾರಿಗಳು ಜಿಲ್ಲಾಧ್ಯಂತ ಐ.ಪಿ.ಎಲ್. ಬೆಟ್ಟಿಂಗ್‍ದಂದೆ ನಡೆಯುತ್ತಿರುವುದು ನಮ್ಮ ಗಮನಕ್ಕೂ ಬಂದಿದೆ. ಹಾಗೂ ಈ ದಂದೆ ವ್ಯವಸ್ಥಿತವಾಗಿ ಕೋಡ್ ವರ್ಕ್ ಮತ್ತು ಸನ್ನೆಗಳ ಮೂಲಕ ನಡೆಯುವುದರಿಂದ ಪತ್ತೆ ಹಚ್ಚುವುದು ಪೋಲಿಸ್ ಇಲಾಖೆಗೂ ಸವಾಲಿನ ಕೆಲಸವಾಗಿದೆ. ಬಾರ್ & ರೆಸ್ಟೋರೆಂಟ್‍ಗಳು, ಲಾಡ್ಜ್‍ಗಳು ಡಾಬಾಗಳು ಮೇಲೆ ನಿಗಾವಹಿಸಿ ಈ ದಂದೆಗೆ ಸಂಪೂರ್ಣ ಕಡಿವಾಣ ಹಾಕಿ ಅಮಾಯಕರ ಜೀವ ಉಳಿಸುವ ಭರವಸೆ ನೀಡಿದರು.  ಜೊತೆಗೆ ಸಾರ್ವಜನಿಕರು, ಸಂಘ ಸಂಸ್ಥೆಗಳ ಗಮನಕ್ಕೆ ನಡೆಯುತ್ತಿರುವ ಅಡ್ಡಗಳ ವಿವರ ಗೊತ್ತಾದರೆ, ಕೂಡಲೇ ನಮಗೆ ಅಥವಾ ನಮ್ಮ ಕಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡದರೆ, ಕೂಡಲೇ ಅಂತಹ ಅಡ್ಡಗಳ ಮೇಲೆ ದಾಳಿ ಮಾಡಲಾಗುವುದೆಂದು ಭರವಸೆ ನೀಡಿದರು. 

ಈ ಮನವಿ ನೀಡುವಾಗ ಜಿಲ್ಲಾ ಸಂಚಾಲಕ ಕೆ.ಶ್ರೀನಿವಾಸಗೌಡ, ನರಸಾಪುರ ಪುರುಶೋತ್ತಮ್, ಸುಪ್ರಿಂ ಚಲ, ಸಾಗರ್, ರಂಜಿತ್, ಈಕಂಬಳ್ಳಿ ಮಂಜುನಾಥ, ಫಾರುಕ್‍ಪಾಷ, ಯಲವಳ್ಳಿ ಪ್ರಭಾಕರ್, ಮೂರಾಂಡಹಳ್ಳಿ ಶಿವಾರೆಡ್ಡಿ, ಕೃಷ್ಣೇಗೌಡ ಮುಂತಾದ ಜಿಲ್ಲಾ ಮತ್ತು ತಾಲ್ಲೂಕು ಮುಖಂಡರು ಹಾಜರಿದ್ದರು.