ಕೋಲಾರ, ಮಾ ೨೪: ಕುಟುಂಬಕ್ಕೆ ಅಸ್ತಿಭಾರವಾಗಿರುವ ತಾಯಂದಿರು ಗೌರವ,ಸ್ವಾಭಿಮಾನದಿಂದ ಬದುಕುವಂತಾಗಲು ರಾಜ್ಯ ಸರ್ಕಾರದಿಂದ ಮಹಿಳಾ ಸ್ವಸಹಾಯ ಸಂಘಗಳಿಗೆ ಶೂನ್ಯ ಬಡ್ಡಿ ಸಾಲಸೌಲಭ್ಯ ಒದಗಿಸಿರುವುದಾಗಿ ರಾಜ್ಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಆರ್.ರಮೇಶ್ಕುಮಾರ್ ತಿಳಿಸಿದರು.
ತಾಲ್ಲೂಕಿನ ತೊಟ್ಲಿ ಸರ್ಕಾರಿ ಶಾಲಾ ಆವರಣದಲ್ಲಿ ಸುಗಟೂರು ಎಸ್ಎಫ್ಸಿಎಸ್ ಹಾಗೂ ಡಿಸಿಸಿ ಬ್ಯಾಂಕ್ ವತಿಯಿಂದ ಏರ್ಪಡಿಸಿದ್ದ ಬೃಹತ್ ಮಹಿಳಾ ಸಮಾವೇಶಕ್ಕೆ ಚಾಲನೆ ನೀಡಿ, ರೈತರಿಗೆ 2.25 ಕೋಟಿ ರೂ ಶೂನ್ಯ ಬಡ್ಡಿ ಸಾಲದ ಚೆಕ್ಗಳನ್ನು ವಿತರಿಸಿ ಅವರು ಮಾತನಾಡುತ್ತಿದ್ದರು.
ನನ್ನ ತಾಯಿ,ತಂದೆ ಸಾಲದಿಂದ ಅನುಭವಿಸಿದ ನೋವನ್ನು ಕಣ್ಣಾರೆ ಕಂಡಿದ್ದೇನೆ ಎಂದು ತಿಳಿಸಿದ ಅವರು, ತಾಯಂದಿರಿಗೆ ಶೂನ್ಯ ಬಡ್ಡಿಯಡಿ ಸಾಲ ಒದಗಿಸಿ ಶೋಷಣೆಯಿಂದ ಪಾರು ಮಾಡಿ ಅವರ ಋಣ ತೀರಿಸುವ ಸಣ್ಣ ಕೆಲಸ ಮಾಡಿದ್ದೇನೆ ಎಂದರು.
ಬಜೆಟ್ನಲ್ಲಿ ಮಹಿಳಾ ಸಂಘಗಳಿಗೆ ಶೂನ್ಯ ಬಡ್ಡಿ ಸಾಲ ಘೋಷಿಸಿದ ಸಿದ್ದರಾಮಯ್ಯ ಅವರಿಗೆ ಸಾಷ್ಟಾಂಗ ನಮಸ್ಕಾರಗಳು ಎಂದು ತಿಳಿಸಿದ ಅವರು, ಮಳೆಯಿಲ್ಲ ಮನೆಗೆ ಬಂದವರಿಗೆ ಊಟ ನೀಡುವ ಮತ್ತು ಭಿಕ್ಷುಕರಿಗೆ ಕಾಳು ಹಾಕುವ ಶಕ್ತಿಯೂ ಇಲ್ಲವಾಗಿದೆ ಎಂದು ವಿಷಾದಿಸಿದರು.
ಕುಟುಂಬ ಉಸ್ತುವಾರಿ ವಹಿಸಿರುವ ತಾಯಂದಿರು ಟೈಲರಿಂಗ್,ಹಸು ಸಾಕಾಣೆ ಹೀಗೆ ಹತ್ತಾರು ಕೆಲಸ ಮಾಡುತ್ತಿದ್ದಾರೆ, ಅವರು ಗೌರವದಿಂದ ಬದುಕುವಂತಾದರೆ ಮಾತ್ರ ಈ ದೇಶ,ಕುಟುಂಬದ ಗೌರವ ಉಳಿಯುತ್ತದೆ ಎಂದರು.
ಏಪ್ರಿಲ್ಮೂರನೇವಾರ 10 ಕೋ.ರೂ ಸಾಲ
ಸುಗಟೂರು ಹೋಬಳಿ ವ್ಯಾಪ್ತಿಯ ಮಹಿಳೆಯರಿಗೆ ಏಪ್ರಿಲ್ ಮೂರನೇವಾರ 10 ಕೋಟಿ ರೂಗಳ ಶೂನ್ಯಬಡ್ಡಿ ಸಾಲವನ್ನು ವಿತರಿಸುವುದಾಗಿ ಭರವಸೆ ನೀಡಿದರು.
ತಾಯಂದಿರು ತಮ್ಮ ಕೊರಳಲ್ಲಿನ ಸರ,ಓಲೆ ಎಲ್ಲವನ್ನು ಹಲವುಖಾಸಗಿ ಹಣಕಾಸು ಸಂಸ್ಥೆಗಳಲ್ಲಿ ಅಡವಿಟ್ಟಿದ್ದಾರೆ ಎಂದರು.
ನಮ್ಮ ತಾಯಿಯ ಕೊರಳಲ್ಲಿನ ಸರ ಅಡವಿಟ್ಟಿದ್ದು, ಅವರು ಹರಾಜು ಹಾಕಿದರೆ ಅದು ನಮ್ಮ ತಾಯಿಯನ್ನೇ ಹರಾಜು ಹಾಕಿದಂತೆ ಎಂದು ನೊಂದು ನುಡಿದ ಸಚಿವರು, ಈ ಬಗ್ಗೆ ಸದನದಲ್ಲಿ ನಾನೆಷ್ಟು ಕೂಗಿದರೂ ಅನೇಕರಿಗೆ ಅರ್ಥವೇ ಆಗಲಿಲ್ಲ ಎಂದರು.
ಹಸಿವಿಗೆ ಪಕ್ಷವಿಲ್ಲ - ಜಾತಿ,ರಾಜಕೀಯವಿಲ್ಲ
ನಾನು ರಾಜಕೀಯಕ್ಕಾಗಿ,ಓಟಿಗಾಗಿ ತಾಯಂದಿರಿಗೆ ಶೂನ್ಯ ಬಡ್ಡಿ ಸಾಲ ಕೊಡಿಸುವ ಕೆಲಸ ಮಾಡಲಿಲ್ಲ, ನಿಮ್ಮನ್ನು ಓಟು ಕೇಳುತ್ತಿಲ್ಲ, ಆರೋಗ್ಯ ಆಯಸ್ಸು ನೀಡಿ ಆಶೀರ್ವದಿಸಿ ಅಷ್ಟೇ ಸಾಕು ಎಂದು ಮನವಿ ಮಾಡಿದರು.
ಹಸಿವಿಗೆ ಜಾತಿ,ಪಕ್ಷ,ರಾಜಕೀಯವಿಲ್ಲ ಎಂದರು.
ನೀವೇನು ಮಾಡಿದಿರಿ ಎಂದು ನೀವು ಕೇಳಬಾರದು ಎಂದೇ ಶೂನ್ಯ ಬಡ್ಡಿ ಸಾಲ ಕೊಡಿಸುವ ಈ ಕೆಲಸ ಮಾಡಿದ್ದೇನೆ, ಸಣ್ಣಪುಟ್ಟ ಸಾಲ ಪಡೆದ ಬಡವರಾರೂ ದೇಶ,ಬ್ಯಾಂಕ್ ಮುಳುಗಿಸೊಲ್ಲ ಇಂತವರಿಗೆ ನೀಡುವ ಸಾವಿರರೂ ಸಾಲಕ್ಕೆ ಭದ್ರತೆ ಕೇಳುತ್ತಾರೆ, ಸಾಲ ಪಾವತಿಸದಿದ್ದರೆ ಮನೆ ಮುಂದೆ ತಮಟೆ ಬಾರಿಸಿ ಮರ್ಯಾದೆ ಹರಾಜು ಹಾಕುತ್ತಾರೆ.
ಪ್ರತಿ ಮಹಿಳೆಗೂ 50 ಸಾವಿರ ಸಾಲ
ಕೋಲಾರ,ಚಿಕ್ಕಬಳ್ಳಾಪುರ ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಬ್ಯಾಲಹಳ್ಳಿ ಗೋವಿಂದಗೌಡ, ಸುಗಟೂರು ಹೋಬಳಿಯಲ್ಲಿ ಈಗಾಗಲೇ 3 ಕೋಟಿ ರೂ ಸಾಲ ನೀಡಲಾಗಿದೆ, ಇದೀಗ ಶೂನ್ಯ ಬಡ್ಡಿ ಸಾಲವನ್ನು ಪ್ರತಿ ತಾಯಂದಿರಿಗೂ ತಲಾ 50 ಸಾವಿರ ನೀಡುತ್ತಿದ್ದು, ಕೂಡಲೇ ಮಹಿಳಾ ಸಂಘ ರಚಿಸಿಕೊಳ್ಳಿ ಎಂದು ಕರೆ ನೀಡಿದರು.
ಡಿಸಿಸಿ ಬ್ಯಾಂಕಿಗೆ ಬೆನ್ನೆಲುಬಾಗಿ ಇದೀಗ ಮತ್ತೆ ಬ್ಯಾಂಕಿಗೆ 5 ಕೋಟಿ ರೂ ಬಿಡುಗಡೆ ಮಾಡಿಸುವ ಭರವಸೆ ನೀಡಿರುವ ರಮೇಶ್ಕುಮಾರ್ ಅವರ ಬಡವರಪರ ಕಾಳಜಿಗೆ ನಿಮ್ಮ ಆಶೀರ್ವಾದವಿರಲಿ ಎಂದರು.
ಡಿಸಿಸಿ ಬ್ಯಾಂಕ್ ನಿರ್ದೇಶಕನಾಗನಾಳ ಸೋಮಣ್ಣ, ಕೆಯುಡಿಎ ಮಾಜಿ ಅಧ್ಯಕ್ಷ ವಿ.ವೆಂಕಟಮುನಿಯಪ್ಪ,ಗ್ರಾ.ಪಂ ಅಧ್ಯಕ್ಷೆ ಅಶ್ವಿನಿ ಬಾಬು ಮಾತನಾಡಿದರು.
ಕಾರ್ಯಕ್ರಮದಲ್ಲಿ ಪಿಎಲ್ಡಿ ಬ್ಯಾಂಕ್ ನಿರ್ದೇಶಕ ಕೃಷ್ಣೇಗೌಡ, ಎಸ್ಎಫ್ಸಿಎಸ್ ಅಧ್ಯಕ್ಷ ತಿಮ್ಮರಾಯಪ್ಪ, ಎಪಿಎಂಸಿಮಾಜಿ ಉಪಾಧ್ಯಕ್ಷ ಕೃಷ್ಣಪ್ಪ, ತಾಪಂ ಸದಸ್ಯರಾದ ಪದ್ಮಾವತಮ್ಮ, ಆಂಜಿನಮ್ಮ ತಿರುಮಳಪ್ಪ, ಮಂಜುನಾಥ್, ಮುಖಂಡರಾದ ನಾಗನಾಳ ಮಂಜುನಾಥ್, ತೊಟ್ಲಿ ವೆಂಕಟರಾಮರೆಡ್ಡಿ ಮತ್ತಿತರರು ಉಪಸ್ಥಿತರಿದ್ದರು.
ಸವಿತಾ ನಾಗೇಂದ್ರಶೆಟ್ಟಿ ಪ್ರಾರ್ಥಿಸಿ, ತಿಮ್ಮರಾಯಪ್ಪ ಸ್ವಾಗತಿಸಿ, ಅಂಕತಟ್ಟಿ ಬಾಬು ನಿರೂಪಿಸಿ, ವಂದಿಸಿದರು.
ಕೋಲಾರ ತಾಲ್ಲೂಕು ತೊಟ್ಲಿಯಲ್ಲಿ ಬೃಹತ್ ಮಹಿಳಾ ಸಮಾವೇಶದಲ್ಲಿ ಪಾಲ್ಗೊಂಡಿದ್ದ ಬೃಹತ್ ಸಂಖ್ಯೆಯ ಮಹಿಳೆಯರು.