ಉಚಿತ ಡಾಟಾ, ಟಾಕ್ಟೈಮ್: ಗೋವಾ ಸರ್ಕಾರದಿಂದ ಯುವಜನತೆಗೆ ಕೊಡುಗೆ
ಪಣಜಿ: ಕೇಂದ್ರ ಸರಕಾರದ ಡಿಜಿಟಲ್ ಇಂಡಿಯಾ ಉಪಕ್ರಮಕ್ಕನುಗುಣವಾಗಿ ಗೋವಾ ಸರಕಾರವು ರಾಜ್ಯದ ಯುವಜನತೆಗೆ ಸೀಮಿತ ಉಚಿತ ಟಾಕ್ಟೈಮ್ ಮತ್ತು ಇಂಟರನೆಟ್ ಡಾಟಾ ಒದಗಿಸುವ ತನ್ನ ಮಹತ್ವಾಕಾಂಕ್ಷೆಯ ಯೋಜನೆಗೆ ನಾಳೆ, ಸೋಮವಾರ ಚಾಲನೆ ನೀಡಲಿದೆ.
ಗೋವಾ ಯುವ ಸಂಚಾರ ಯೋಜನೆಯಡಿ 16ರಿಂದ 30ವರ್ಷ ವಯೋಮಾನದ ಯುವಜನತೆಗೆ ಪ್ರತಿ ತಿಂಗಳು ಸಿಮ್ ಕಾರ್ಡ್ ಜೊತೆಗೆ 100 ನಿಮಿಷಗಳ ಟಾಕ್ಟೈಮ್ ಮತ್ತು 3 ಜಿಬಿ ಇಂಟರ್ನೆಟ್ ಡಾಟಾ ಒದಗಿಸಲಾಗುವುದು ಎಂದು ಮುಖ್ಯಮಂತ್ರಿ ಲಕ್ಷೀಕಾಂತ ಪಾರ್ಸೇಕರ್ ಅವರು ಇಂದಿಲ್ಲಿ ಸುದ್ದಿಗಾರರಿಗೆ ತಿಳಿಸಿದರು. ಸರಕಾರವು ಇದಕ್ಕಾಗಿ ವೊಡಾಫೋನ್ ಜೊತೆ ಒಪ್ಪಂದವನ್ನು ಮಾಡಿಕೊಂಡಿದ್ದು, ಸುಮಾರು 1.25 ಲಕ್ಷ ಯುವಜನರಿಗೆ ಇದರ ಲಾಭ ದೊರೆಯಲಿದೆ.ಫಲಾನುಭವಿಯು ಯೋಜನೆಯ ದುರುಪಯೋಗ ಮಾಡಿಕೊಂಡರೆ ಸೌಲಭ್ಯವನ್ನು ಸರಕಾರವು ಹಿಂದೆಗೆದುಕೊಳ್ಳಲಿದೆ ಎಂದು ಪಾರ್ಸೇಕರ್ ಹೇಳಿದರು.