ಭಟ್ಕಳ: ನಾಗರ ಪಂಚಮಿಯ ಪ್ರಯುಕ್ತ ಭಟ್ಕಳದ ಶ್ರೀ ನಾಗಯಕ್ಷೆ ಧರ್ಮದೇವಿ ಸಂಸ್ಥಾನದಲ್ಲಿ ಶ್ರೀ ದೇವರಿಗೆ ಚಿನ್ನದ ಆರತಿ ಸಮರ್ಪಣೆ,  ವಿಶೇಷ ಅಲಂಕಾರ, ಮಹಾಪೂಜೆ ಹಾಗೂ ಅನ್ನಸಂತರ್ಪಣೆ ಕಾರ್ಯಕ್ರಮ ನಡೆಯಿತು. 
ತಾಲೂಕಿನಲ್ಲಿ ಇಂದು ನಾಗರ ಪಂಚಮಿಯ ಪ್ರಯುಕ್ತ ನಾಗ ಬನಗಳು ಹಾಗೂ ದೇವಾಲಯಕ್ಕೆ ತೆರಳಿ ನಾಗದೇವರಿಗೆ ವಿಶೇಷ ಪೂಜೆಗಳನ್ನು ಸಲ್ಲಿಸಿ ಭಕ್ತರು ತಮ್ಮ ಇಷ್ಟಾರ್ಥ ಸಿದ್ಧಿಗಾಗಿ ಪ್ರಾರ್ಥಿಸುತ್ತಿರುವುದು ಸಾಮಾನ್ಯವಾಗಿತ್ತು.  ಅದರಂತೆ  ನಗರದ ಪ್ರಸಿದ್ದ ನಾಗದೇವಾಲಯದಲ್ಲಿ ಒಂದಾದ ಮಣ್ಕುಳಿಯ ಶ್ರೀ ನಾಗಯಕ್ಷೆ ದೇವಸ್ಥಾನದಲ್ಲಿ ಕೂಡಾ ಸಾವಿರಾರು ಭಕ್ತರು ಶ್ರೀ ದೇವರ ದರ್ಶನ ಪಡೆದು ಮಹಾಪೂಜೆ, ಮಂಗಳಾರತಿಯಲ್ಲಿ ಭಾಗವಹಿಸಿ ಅನ್ನ ಪ್ರಸಾದ ಸ್ವೀಕರಿಸಿದರು. 
ಬೆಳಿಗ್ಗೆಯಿಂದಲೇ ದೇವಳಕ್ಕೆ ಸಾವಿರಾರು ಭಕ್ತರು ಶ್ರೀ ನಾಗಯಕ್ಷೆಯ  ದರ್ಶನಕ್ಕೆ ಬಂದಿದ್ದು, ಶ್ರೀ ದೇವರ ದರ್ಶನ ಪಡೆದರು. ನಾಗರ ಪಂಚಮಿಯಂದು ವಿಶೇಷವಾಗಿ ಶ್ರೀ ನಾಗಯಕ್ಷೆ ದೇವಿಗೆ ಚಿನ್ನದ ಆರತಿಯನ್ನು ಸಮರ್ಪಿಸಲಾಗಿದ್ದು  ದೇವಸ್ಥಾನಕ್ಕೆ ಬಂದಂತಹ  ಭಕ್ತರೆಲ್ಲಾ ಆರತಿಯನ್ನು ಮುಟ್ಟಿ ತಮ್ಮ ತಮ್ಮ ಸಂಕಲ್ಪವನ್ನು ಈಡೇರಿಸುವಂತೆ ಬೇಡಿಕೊಂಡರು.  
ಪೂಜೆಯ ಸಂಧರ್ಭದಲ್ಲಿ ದೇವಸ್ಥಾನದ ಧರ್ಮದರ್ಶಿ ರಾಮದಾಸ ಪ್ರಭುರವರು ನಾಗ ದೇವಿಯ ಮೈದರ್ಶನದಲ್ಲಿ ನೆರೆದಿದ್ದ  ದೇವಿಯ ಹಲವಾರು ಭಕ್ತರು  ತಮ್ಮ ತಮ್ಮ ಕಷ್ಟಕಾರ‍್ಪಣ್ಯಗಳನ್ನು ಕೇಳಿ ಪರಿಹಾರದ ದಾರಿ ಪಡೆದುಕೊಂಡರು. ಈ ಹಿಂದೆ ೨೦೦೯ರಲ್ಲಿ ದೇವಿಗೆ ೭ ಕೆ.ಜಿ. ಚಿನ್ನದಲ್ಲಿ ಮಾಡಿದ ಚಿನ್ನದ ಮುಖವಾಡ, ಕವಚಗಳನ್ನು ಸಮರ್ಪಿಸಿದ್ದನ್ನು ಸ್ಮರಿಸಿಕೊಳ್ಳಬಹುದು.  ಈ ವರ್ಷ ದೇವಿಗೆ ಚಿನ್ನದ ಆರತಿಯನ್ನು ಸಮರ್ಪಿಸಿದ್ದು ಮಹಾಪೂಜೆಯ ಸಮಯದಲ್ಲಿ ಚಿನ್ನದ ಆರತಿಯನ್ನು ಬೆಳಗಿರುವುದನ್ನು ಭಕ್ತರು ಕಣ್ತುಂಬಿಕೊಂಡರು.