ಭಟ್ಕಳ: ಪರಿಶಿಷ್ಟ ಪಂಗಡದ ಗೊಂಡ ಜಾತಿಯವರೆಂದು ಸುಳ್ಳು ಜಾತಿ ಪ್ರಮಾಣ ಪತ್ರ ಪಡೆದು ಪುರಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಿರುವ ಕುರಿತು ಮಹಿಳೆಯೊಬ್ಬರ ಮೇಲೆ ನಾಗರಿಕ ಹಕ್ಕು ಜಾರಿ ನಿರ್ದೇಶನಾಲಯ ಪ್ರಕರಣ ದಾಖಲಿಸಲಾಗಿದೆ. 

ಸುಳ್ಳು ಜಾತಿ ಪ್ರಮಾಣ ಪತ್ರ ಪಡೆದ ಮಹಿಳೆ ತಿಮ್ಮು ಗೊಂಡ ಎಂದು ತಿಳಿದು ಬಂದಿದ್ದು, ಅವರು ತಾವು ಗೊಂಡ ಜಾತಿಗೆ ಸೇರಿದವರೆಂದು 1997ರ ಆಗಸ್ಟ್ 22ರಂದು ಇಲ್ಲಿನ ತಹಸೀಲ್ದಾರರಿಂದ ಜಾತಿ ಪ್ರಮಾಣ ಪತ್ರ ಪಡೆದುಕೊಂಡಿದ್ದರು. ಅದರ ಆಧಾರದ ಮೇಲೆ ಪುರಸಭೆಯಲ್ಲಿ ಪರಿಶಿಷ್ಟ ಪಂಗಡಕ್ಕೆ ಮೀಸಲಿರುವ ಸದಸ್ಯ ಸ್ಥಾನಕ್ಕೆ ಸ್ಪರ್ಧಿಸಿ ವಾರ್ಡ್ ನಂ-11ರ ಸೂಸಗಡಿಯಿಂದ ಆಯ್ಕೆಯಾಗಿದ್ದರು.

ಹಿಂದುಳಿದ ವರ್ಗ ಪ್ರವರ್ಗ-1ರ ಗ್ರಾಮ ಒಕ್ಕಲಿಗ ಜಾತಿಗೆ ಸೇರಿದವರಾಗಿರುವ ತಿಮ್ಮು ಅವರು ಸುಳ್ಳು ಪ್ರಮಾಣ ಪತ್ರ ಪಡೆದು ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡದವರಿಗೆ ಮತ್ತು ಸರ್ಕಾರಕ್ಕೆ ವಂಚಿಸಿರುವ ಬಗ್ಗೆ ಸಾಬೀತಾ ಹಿನ್ನೆಲೆಯಲ್ಲಿ ಮಂಗಳೂರಿನ ಜಾರಿ ನಿರ್ದೇಶನಾಲಯದ ಪೊಲೀಸ್ ನಿರೀಕ್ಷಕ ಮಹಮ್ಮದ್ ಕೆ. ದೂರು ದಾಖಲಿಸಿದ್ದಾರೆ.

ಕಲಂ 3(1) ಎಸ್.ಸಿ. ಎಸ್. ಟಿ ತಿದ್ದುಪಡಿ ಕಾಯ್ದೆ (ಜಾತಿ ನಿಂದನೆ ನಿರ್ಬಂಧ ಕಾಯ್ದೆ) 2015 ಮತ್ತು ಕಲಂ 198, 420 ಐಪಿಸಿ ಅಡಿ ಪ್ರಕರಣ ಭಟ್ಕಳ ನಗರ ಠಾಣೆಯಲ್ಲಿ ದಾಖಲಾಗಿದೆ.