ಭಟ್ಕಳ: ಪ್ರಧಾನ ಮಂತ್ರಿ ಆವಾಸ್ ಯೋಜನೆಯಡಿ ಮನೆ ನಿರ್ಮಿಸಿಕೊಳ್ಳಲು ವಾರ್ಷಿಕ ರೂ.3.00 ಲಕ್ಷದಿಂದ ರೂ.18.00 ಲಕ್ಷವರೆಗೆ ಆದಾಯವಿದ್ದ (ಸರಕಾರಿ ನೌಕರರನ್ನೊಳಗೊಂಡು) ಭಟ್ಕಳ ಪುರಸಭೆ ವ್ಯಾಪ್ತಿಯಲ್ಲಿ ವಾಸಿಸುವ ಮಧ್ಯಮ ವರ್ಗದವರು ಹಾಗೂ ಇತರರಿಗೆ ಸಾಲ ಸೌಲಭ್ಯ ದೊರೆಯಲಿದ್ದು ಸೌಲಭ್ಯ ಪಡೆದುಕೊಳ್ಳುವಂತೆ ಪುರಸಭಾ ಮುಖ್ಯಾಧಿಕಾರಿಗಳು ಪ್ರಕಟಣೆಯಲ್ಲಿ ಕೋರಿದ್ದಾರೆ.
ಸಾಲ ಮಂಜೂರಾತಿಯ ಅವಧಿ 20 ವರ್ಷಗಳಾಗಿದ್ದು ವಾರ್ಷಿಕ ಆದಾಯಕ್ಕನುಗುಣವಾಗಿ ಸಹಾಯಧನವುಳ್ಳ ಕಡಿಮೆ ಬಡ್ಡಿ ದರದ ಸಾಲ ಸೌಲಭ್ಯ ಪಡೆಯಬಹುದು. ವಾರ್ಷಿಕ ರೂ.3.00 ಲಕ್ಷಗಳವರೆಗೆ ಆದಾಯ ಹೊಂದಿದವರು 30 ಚ.ಮೀ. ಅಥವಾ 60 ಚ.ಮೀ. ವಿಸ್ತೀರ್ಣದ ಮನೆ ಕಟ್ಟಿಕೊಳ್ಳಲು ರೂ.6.00 ಲಕ್ಷ ಸಾಲ ಪಡೆಯಬಹುದಾಗಿದೆ. ಇದಕ್ಕೆ ಶೇ.6.5% ಬಡ್ಡಿ ರಿಯಾಯಿತಿ ನೀಡಲಾಗುತ್ತಿದೆ. ಇದರಿಂದ ಒಟ್ಟೂ ರೂ. 2.67 ಲಕ್ಷ ಬಡ್ಡಿ ಸಹಾಯಧನ ದೊರೆಯುತ್ತದೆ. ರೂ.6.01 ಲಕ್ಷದಿಂದ ರೂ. 12.00 ಲಕ್ಷವರೆಗೆ ಆದಾಯ ಹೊಂದಿದವರು 160 ಚ.ಮೀ. ವಿಸ್ತೀರ್ಣದ ಮನೆ ಕಟ್ಟಿಕೊಳ್ಳಲು ರೂ.9.00 ಲಕ್ಷ ಸಾಲ ಪಡೆಯಬಹುದಾಗಿದೆ. ಇದಕ್ಕೆ ಶೇ.4% ಬಡ್ಡಿ ರಿಯಾಯಿತಿ ನೀಡಲಾಗುತ್ತಿದೆ. ಇದರಿಂದ ಒಟ್ಟೂ ರೂ.2.35 ಲಕ್ಷ ಬಡ್ಡಿ ಸಹಾಯಧನ ದೊರೆಯುತ್ತದೆ. ರೂ.12.01 ಲಕ್ಷದಿಂದ ರೂ. 18.00 ಲಕ್ಷವರೆಗೆ ಆದಾಯ ಹೊಂದಿದವರು 200 ಚ.ಮೀ. ವಿಸ್ತೀರ್ಣದ ಮನೆ ಕಟ್ಟಿಕೊಳ್ಳಲು ರೂ.12.00 ಲಕ್ಷ ಸಾಲ ಪಡೆಯಬಹುದಾಗಿದೆ. ಇದಕ್ಕೆ ಶೇ.3% ಬಡ್ಡಿ ರಿಯಾಯಿತಿ ನೀಡಲಾಗುತ್ತಿದೆ. ಇದರಿಂದ ಒಟ್ಟೂ ರೂ.2.30 ಲಕ್ಷ ಬಡ್ಡಿ ಸಹಾಯಧನ ದೊರೆಯುತ್ತದೆ ಎಂದೂ ತಿಳಿಸಲಾಗಿದೆ. ಪ್ರಧಾನ ಮಂತ್ರಿ ಆವಾಸ್ ಯೋಜನೆಯಡಿ ಮನೆ ನಿರ್ಮಿಸಿಕೊಳ್ಳಲು ಅಪೇಕ್ಷಿಸುವ ಸರಕಾರಿ ನೌಕರನ್ನೊಳಗೊಂಡು ಮಧ್ಯಮ ವರ್ಗದವರು ಹಾಗೂ ಇತರರು ಈ ಸೌಲಭ್ಯವನ್ನು ಪಡೆಯಬಹುದಾಗಿದೆ ಎಂದೂ ತಿಳಿಸಲಾಗಿದೆ.