ಭಟ್ಕಳ: ತಾಲೂಕಿನ ಬೆಂಗ್ರೆ ಗ್ರಾಮ ಪಂಚಾಯತ ವ್ಯಾಪ್ತಿಯಲ್ಲಿರುವ ಶಿಲೆಕಲ್ಲು ಕ್ವಾರಿ ಪರಿಶೀಲನೆಗೆ ತೆರಳಿದ ಭಟ್ಕಳ ಸಹಾಯಕ ಕಮಿಷನರ್‍ರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಕರ್ತವ್ಯಕ್ಕೆ ಅಡ್ಡಿ ಪಡಿಸಿರುವ ಆರೋಪಕ್ಕೆ ಸಂಬಂಧಿಸಿದಂತೆ ಮುರುಡೇಶ್ವರ ಪೊಲೀಸರು ಓರ್ವನನ್ನು ಬಂಧಿಸಿದ್ದು, ಇನ್ನೋರ್ವ ಪರಾರಿಯಾಗಿರುವ ಘಟನೆ ನಡೆದಿದೆ.
 ಬಂಧಿತ ಆರೋಪಿಯನ್ನು ಬೆಂಗ್ರೆ ಮಲ್ಲಾರಿಯ ನಿವಾಸಿ ಈಶ್ವರ ರಾಮಸ್ವಾಮಿ ನಾಯರ್ ಎಂದು ಗುರುತಿಸಲಾಗಿದ್ದು, ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ. ಮೋಹನ ಮಂಜುನಾಥ ನಾಯ್ಕ ತಲೆ ಮರೆಸಿಕೊಂಡಿರುವ ಆರೋಪಿಯಾಗಿದ್ದಾನೆ. ಐಆರ್‍ಬಿ ಕಾಮಗಾರಿಯ ಸಂಬಂಧ ನಡೆದಿರುವ ಶಿಲೆಕಲ್ಲು ಕ್ವಾರಿ ಸ್ಪೋಟ ಹಾಗೂ ಹಾನಿಯ ಸಂಬಂಧ ಜಿಲ್ಲಾಧಿಕಾರಿಗಳ ಸೂಚನೆಯ ಮೇರೆಗೆ ಎಸಿ ಎಮ್.ಎನ್.ಮಂಜುನಾಥ ಸೋಮವಾರ ಸಂಜೆ ಪರಿಶೀಲನೆಗೆ ತೆರಳಿದ್ದರು. ಆರೋಪಿಗಳು ಪಾನಮತ್ತರಾಗಿ ಇನ್ನೋವಾ ಕಾರಿನಲ್ಲಿ ಬಂದು ಎಸಿಯವರನ್ನು ಅಡ್ಡಗಟ್ಟಿ ನಿಂದಿಸಿ ಕರ್ತವ್ಯಕ್ಕೆ ಅಡ್ಡಿಪಡಿಸಿದ್ದಾರೆ ಎಂದು ಆಪಾದಿಸಲಾಗಿದೆ. ಈ ಕುರಿತು ಎಸಿ ಮಂಜುನಾಥ ನೀಡಿರುವ ದೂರನ್ನು ಸ್ವೀಕರಿಸಿರುವ ಪೊಲೀಸರು ತನಿಖೆಯನ್ನು ಮುಂದುವರೆಸಿದ್ದಾರೆ.